Baturai Pantun III
Gunung Batu Banawa
Oleh: Ampeak Sie Kaminting Pidakan, Kelua
Iwak patin tatak sapanggal
Buat ka rinjing lalu disanga
Radin pangantin anak nang tunggal
Diang Ingsun kuitan tuha
Iwak patin lawas tarandam
Lalu disanga di minyak sanggar
Radin pangantin tulak madam
Lalawasannya jadi saudagar
Kain satatak di atas mija
Jumput jarum mangambit bantal
Babini anak putri raja
Mambawa kapal nang paling ganal
Kaut galapung baulah bingka
Wadai satu baras lakatan
Bulik kampung jadi durhaka
Kada mangaku lawan kuitan
Wadai kalalapun andak di wadah
Kakicak bakapur manis hintinya
Diang Ingsun lalu manyumpah
Datang guntur lawan patirnya
Wadai cincin si wadai cucur
Buah kanas jadi alua
Kapal Radin balalu hancur
Jadi batu nitu asalnya