Ebook Bubuhan Jingah Rabit Vol.3

Sakapur Sirih Matan Admin
Bubuhan Jingah Rabit

Ebook BJR V.3

Nangkaya biasanya, bila handak baulah kata pangantar, pasti dah takang utak. Jadi ibarat jalan tu, jalan buntu. Tapaksa ae dikawani sabungkus ruku LA wan 2 cangkir kopi mik, nintu gin kada cukup, hanyar saparu manulis tapaksa balalah dahulu ka warung Acil Enor mancari inspirasi nangapa nang handak ditulis. Padahal kada banyak kada, cuma kata pangantar.

Takang nang kadua, sakali handak mauplud ka ziddu, pas gangguan. Lawas banar macubai, kada mau juwa. Sakali dicek, pas pulsanya nang habis, labaram. Maklum di kampung, kada kawa nangkaya urang langsung ka warnet, tapaksa kujuk-kujuk mancari urang bajual pulsa. Untung nang bajual bungas urangnya, kurihingnya gin maulah kaganangan saminggu.

Ahirnya kadada ucapan lagi nah, selain Alhamdulillah. Grup Bubuhan Jingah Rabit nang baubah ngaran manjadi Negeri Sambang Lihum kawa pulang maulah 2 buah ebook hanyar. Nang naya bajudul Serial Utuh Palilak, nang ditulis ulih dangsanak kita Datu Panglima Alai, Barabai. Ebook ne baisi kisah 18 buah, nang isinya marupakan kritik sosial nang disampaiakan liwat tukuh utamanya UTUH PALILAK. Jadi ini ebook vulume 3. Ebook vulume 4 nya bajudul Serial Utuh Ujai.

Diaku nang disarahi tugas tukang pos kisah di grup Bubuhan Jingah Rabit, maucapakan tarimakasih nang kada tahingga atas dukungan kakawanan nang sama-sama baisi ambisi hagan maangkat budaya Banjar malalui kisah. Jangan sampai budaya Banjar hilang di bumi ujar urang bahari.

Juwa, kada manutup kamungkinan dalam kisah naya ada nang manyinggung sabagian kakawanan, sacara pribadi admin muhun maaf wan minta rila saganal langit wan bumi.

Bahasa nang digunakan juwa masih bacampur wan bahasa Indunesia, maklum adminnya banyak kada paham bahasa urang bahari, jadi sambil balajar ae.

Kadada lagi nah nang parlu dipanderakan salain kata “salamat mambaca” haja. Wan juwa tunggu kehadiran kisah salanjutnya nang bajudul Serial Utuh Ujai.

Salam Hurmat wan Barilaan,

Pambakal Jingah Rabit

DOWNLOAD

Iklan

MANANAI LIDING

MANANAI LIDING
Oleh: Datu Panglima Alai

Utuh Palilak naya biar bagana di kampung, tapi inya sakakali rancak haja jua balalah ka Banjar wadah mamarinanya. Mamarinanya Utuh Palilak ni badiam di Kalayan. Wayah nintu pas musim kamarau sing ngalihan mancari banyu barasih gasan bamasak, ada haja pang liding bapasang wadah mamarinanya si Utuh Palilak ni, tapi banyunya babaya kaluar, mun kada malam hanyar kawa ditanai.

Malam nintu Utuh Palilak bajaga banyu tangah malam wadah mamarinanya, sambil nuntun tipi inya mananai liding pakai baskum ganal. Sing lawasan inya mahadang sakira hibak wadahnya, sampai habis sajudul pilm di tipi hanyar hibak, kanapa pas nintu babaya handak hibak timbul banyu di dalam baskum ti sasain basurut kaya di hisap, kada lawas habis sabaskoman. Sing pusangan Utuh Palilak, imbah lapah mahibakakan timbul habis, sakalinya tadangar urang di subalah rumah babunyi masin banyu.

“Kira-kira nintu pang panyababnya” ujar Utuh Palilak gagarunum.

Isuknya bajaga pulang inya tangah malam mananai liding, parak hibak sudah baskum ganal, kada lawas tadangar pulang urang subalah rumah mahidupi masin banyu, lalu lakas ai Utuh Palilak Manuang Kasumba Habang dalam baskum, kada lawas tadangar mandasau Urang subalah rumah manumpah banyu, lucut Utuh Palilak tatawa.

“Marasa kada, tahiut banyu satrup kada bagula” ujar Utuh Palilak bapandir saurangan.

Isuknya tatawa pulang Utuh Palilak pas maliat barumahan urang subalah ti pina mahabang, rupanya sadrum-an urang ti manumpah banyu malam tadi, dapatnya digawi Utuh Palilak.

UTUH PALILAK BAJUALAN ITIK

UTUH PALILAK BAJUALAN ITIK
Oleh: Datu Panglima Alai

Hari Sanayan di kampung Utuh Palilak ni rami bangat sabab hari nintu hari pasar. Rami tu pang urang ka pasaran, nang di gunung gin turunan. Bubuhan sakulahan waktu paraiannya talawasi pada biasa, mun biasanya 15 manit mun hari Sanayan bisa 30 manit. Waktu lagi halus Utuh Palilak suah batakun wadah kayinya.

“Kayi kanapa bila hari Sanayan, urang di sakulahan apel Bandira” ujar Utuh Palilak. “Inya Sanayan tu hari Pasar pang luku” sahut Kayinya. Baca lebih lanjut

SI ANANG PUTIH

SI ANANG PUTIH
Oleh: Datu Panglima Alai

Utuh Palilak ada baisian kawan, ngarannya Anang Putih, sasuai wan galar maka nang ngaran Anang Putih ni urangnya dasar putih. Di kampung Utuh Palilak ni sabarataan kakawanannya sampai nang tuha-tuha baisi galar, asa kada akrab tu pang mun kada mangiyau galar.

Wayah nintu sapakawanan bubuhannya lagi takumpulan di gardu simpang tiga tuturunan jambatan, ada Utuh Palilak, Utuh Dungkuk, Amat Puyau, Anang Putih wan Udin Habuk. Rami bubuhannya bawawarahan sampai bakukuyaan bibinian, kada lawas buhannya taliati ka pipi si Anang Putih. Baca lebih lanjut

MALING BUNGUL

MALING BUNGUL
oleh: Datu Panglima Alai

Wayah nintu di kampung Utuh Palilak lagi musim sakit banar pancarian, ujar istilah bubuhan Jakarta “krisis munitir”, haraga barang saraba larang, maka musim kamarau ha pulang. Gara-gara kahidupan sakit bangat nintu lalu kaadaan kampung kada aman lagi, bamaling banar maka saraba dipalarnya haja di maling sampai “capal buruk” gin hilang bila kada ingat manaikakan ka rumah. Baca lebih lanjut

UTUH PALILAK MA AKAL DI SAKULAHAN

UTUH PALILAK MA AKAL DI SAKULAHAN
Oleh: Datu Panglima Alai

Utuh Palilak ni sabujurnya urangnya pintar, buktinya pas inya sakulah SMP bujur kada balajar tapi ulangan dapat tarus manjawab walaupun kada 100% bujur, tu mun inya kada balajar, magitnya ai mun inya hakun balajar saku dapatnya barataan manjawab. Utuh Palilak ni tamasuk macal pang urangnya, tulak sakulah kada mau jalan timbuk pasti mahantas jalan pahumaan di balakang sakulahan. Maka balakang sakulahan tu sudah dikandang kapala sakulah wan pagar kawat baduri tapi Utuh Palilak ni urangnya pintar inya basangu “tang”, jadi ditataknya kawat baduri ti, sasarusup ha mambawa sapida BMX Olympic nang bakuncalak wan tanah. Bujur haja pang mambawa tas tapi isinya lain buku tapi baisi hampalam, asam, rambai mahanu ramania jua. Inya tulak mahantas tu salajur manjatu asam atau hampalam, baju bujur rapi bamasuk ka dalam tapi hibak gatah rambutan nang kaya balang sasirangan haja lagi di baju. Dasi pina tainat talinya panjang banar, sapatu merk Kasogi tapi bagantungan haja di tas napa jalan balicak. Baca lebih lanjut

UTUH PALILAK BABAJU PRAMUKA

UTUH PALILAK BABAJU PRAMUKA
Oleh: Datu Panglima Alai

Utuh Palilak ni lagi sakulah SMA katuju banar umpat pramuka Saka Bhayangkari. Inya kahandakan banar jadi tantara atawa pulisi, makanya amun babaju paramuka tu lalu pina gagah ha balinggang bajalan, apalagi banyak bangat titipakan di bajunya tu mulai pangkat sampai gambar napa-napakah.

Di subalah rumah Utuh Palilak ada bansaw ampun Julak Lambit, wadah urang maulah kayu. Rami bangat saban hari ada nang maatari kayu ada nang bamutur trak ada jua nang bamutur pikap, ujar habar nang ampun bansaw sudah bakait wan bubuhan aparat sakira aman bajual wan ma atar kayu.

Wayah nintu Utuh Palilak hanyar bulik latihan paramuka, sabalum naik ka rumah inya duduk di muhara bansaw Julak Lambit, di situ ada babangkuan naung banar di bawah puhun jambu, jadi nyaman banar baduduk bila kamarian hari panas. Paharatan si Utuh Palilak duduk, kada lawas datang mutur trak mambawa kayu, babaya lalu di muka Utuh Palilak lalu baulur ha tangan supir ma unjuk duit 50 ribuan ka wadah Utuh Palilak, lakas ai Utuh Palilak manyambut imbah itu badadas ai inya naik ka rumah kada sing bunyian.

Isuknya pas kamarian duduk pulang Utuh Palilak di babangkuan ti, sakalinya di situ ada Pa Yono kumandan pulisi nang bakantur di polsek. “Bah ini pang sakalinya kumandan Barimob nang dipadahakan supir trak samalam, kalah 1-0 aku wan ikam Tuh ai” ujar Pa Yono.

“Mun dibari urang duit tu razaki Pa ai, pantang ditulak” ujar Utuh Palilak pupura kada tahu padahal paham haja wan maksud Pa Yono.

Sakalinya gara-gara Utuh Palilak babaju paramuka pakai baret samalam inya disangka supir trak si Adul, Kaur pulisi barimob, cucuk ai inya manjulungi duit.