Pangeran Suriansyah

Pangeran Suriansyah
Cipt. H. Anang Ardiansyah

H. Anang Ardiansyah (Beliau banyak baulah lagu-lagu batema banua kita, Banjar)

(*)
Pangeran, pangeran
Bangaran Raja Buana, ahli waris Karajaan Daha
Dibuang paman, Aria Batahta
Ka Balandean wadah pambukahannya
Di Kampung Kuin diangkat jadi raja
Pangeran Suriansyah itu galarnya

(#)
‘Mun bulan kadap sidin manyarang
Paman Tamanggung kuat babanaran
Sungai Kuin dipagar carucukan
Kampung Carucuk dibari ngaran

Patih Masih lalu pang baucap
Wan Sultan Damak batatulungan
Sultan Manulung baparjanjian
‘Mun Banjar manang masuk Islam

(#)
Kembali ke : (*)

Paman Tamanggung kalah sabakas
Lalu dibagi tanah wan watas
Pangeran ba-islam sabubuhan
Sultan Suriansyah bangaran

Paman ba-islam nang panambayan
Di Kampung Kuin ba’ulah masigit
di situ jua sidin bamakam
Damintu kisah Banjarmasin

Kembali ke : (*), ditambah
Kisah pang pagat, habis carita
Kisah Banjarmasin kota barnama

Takajut Rami

Takajut Rami
Cipt. Nanang Irwan

Kisah takajut rami
Nang baduit pastilah di muka
Tunjuk sini wan sana
Lantaran inya banyak baduit
Salagi anum bagawi
Siang malamnya dianggap sama
Sudah tuha baharta
Arti rami hanyar tahu jua
Sidin takajut rami
Pabila jua ada ampihnya
Amun sudah raminya
Kada ingat ‘pa-apa
Lawan siapa haja
Kadada gairnya
Jalan ada pagatnya
Hidup ada matinya
Mangira banyak baharta
Kawa nukar pahala
Amun sudah takajut rami
Kada ingat di apa-apa
Amun sudah takajut rami
Awak tuha anum pangrasa
Salagi anum bagawi
Siang malam dianggap sama
Sudah tuha baharta
Arti rami hanyar tahu jua

Talambat Badatang

Talambat Badatang
Cipt. Syarifuddin, MS

Sudah lawas ulun manukuy
Ading nang bungas di Sungai Mesa
Urangnya langkar harat di dapur
Kada rigi nang ba urun-urun
Umay lakasi ulun maraakan
Damini jua dipasanakan
Biar pang tahu pian badatang
Balambat-lambat dahulu urang
Umay-umay purunnya hati
Pian badatang sudah batali
Riang-riang di ulu hati
Diharap-harap kada pang jadi 2x

Tanah Bumbu

Tanah Bumbu
Cipt. Nanang Irwan

Hambur dadak hari kadap
Tarang maharap bulan
Barkat rakyat wan mufakat
Hajatnya kasampaian
Ulun, pian, kita
Pasti umpat nyaman
Tanah Bumbu jadi
Indungnya kampung kita
“Bersujud”
Jadi samboyannya
Ampun ulun ampun pian
Ampun kita barataan
Kabupaten Tanah Bumbu
Diatur tata batata
Aman diharap
Kawa diharap
Bapasrah tasarah haja
Ranai kadada untungnya
Barasih syukur
Jujur lawan damai
Samboyannya Tanah Bumbu
Kita ambil maknanya
Badadas baimbai bagawi
Jangan mahambur hiri
Tanah Bumbu sudah badiri
Alhamdulillahi syukuri

Tatangis

Tatangis
Cipt. Hamiedan AC

Tatangis, aku tatangis
Mangganang masa silam,
masa nang silam
Aduhai nang kaya duri
di dalam badan
Lantaran cinta diriku nang kaya ini
Nang kaya ini, siang rindang, malam dandam Kurindang dandam
Aduhai…badanku ini, hancur di dalam
( * )
Saputih banyu susu
Semanis madu
Nang disurung wan aku
Ai wayah dahulu
Saban kali batamu
Sanang hatiku
Riwayat bahagia
Kadada bandingnya
Rasa takibar sumangat
Lamun baduaan
Manggitir sukma ragaku
Dipaluk dirayu
Tatangis, aku tatangis
Bayangan masa silam
tatap kuganang
Aduhai… selama hayat
dikandung badan

Tatarang Upih

Tatarang Upih
Cipt. Nanang Irwan

Haaa haa ha
Haaa haa wan
Haaa haa wan
Mangangan santan
Campur sulur kaladi
Jangan harap hidup nyaman
Amun kulir bagawi
Pina cakah pina musti
Kada kawa disaingi
Haaa haa wan
Haaa haa wan
Amun sakadar tangan
Urak kita mambawa
Kadada labihnya
Mayu gasan makan haja
Kadada kabisaan
Umpat laju balangsam jua
Kada hingkat kada badaya
Awak tuha timbul sasalnya
Huuuuuiiii a huy
Huuuuuiiii a huy
Ingat abah bapasan
Jangan sawat hilang
Ingat uma bapasan
Lantaran sidin sayang
Sakulah pang nak, sakulah
Ujar patuahnya
Manulis lancar mambaca
Gasan ikam jua
Sakulah pang nak, sakulah
Ujar patuahnya
tatarang upih umpama
Tapakai jua
Haaa a a a wan
Haaa a a a wan
Madihin asal lagunya
Ciri bahari dibuang kada
tatarang upih judulnya
Ampun maaf kakurangannya
Madihin asal lagunya
Bahasa Banjar panyampaiannya