KISAH MINTUHA BINI


KISAH MINTUHA BINI
Oleh: Pambakal Sambang Lihum

Takesah Aluh Karamunting nang baminantu 3 ikung, ngarannya Ijun, Busu, wan Utuh Hirman. Acil Enor ne sugih banar tapi netel alias cariwit banar urangnya. Balalu kapikiran handak mauji minantu nang batiga nginih. Kayapa ganalnya kasih sayang wan mintuha?

Singkat kisah, singkat tali salawar, nang mintuha ne mambawai minantunya Ijun bakalotok ka Sungai Barito, jer handak ka Pulau Kambang jer. Rahatan di tangah sungai, nang mintuha ne pura-pura gugur betajun ka sungai. Kada bapikir panjang lagi, langsung minantunya si Ijun betajun juwa ka sungai manulungi sidin. Isuk arinya rahatan Ijun kaluar rumah, takajut malihat mutur TOYOTA KIJANG INNOVA baparkiran di muhara rumah. Imbah dibuka lawangnya, ada sacarik karatas batulisan, “Hadiah Matan Mintuha Bini.” Langsung himung si Ijun, lalu mangisahakan wan Busu.

Isuknya pulang kana giliran si Busu dibawai ka batang banyu. Nang mintuha turun badahulu ka pinggir sungai. Rahatan Busu turun juwa, nang mintuha ne pura-pura tadingsir langsung tacabur ka banyu. Kada banyak pikir lagi, langsung Busu manulungi marga tahu sudah kisahnya matan si Ijun.

“Uma ae, tarimakasih banyak Nak lah, kasiannya dumpit wan hapi ikam basah marga manulungi aku,” jer nang mintuha.

“Kada papa ma ae, daripada pian lamas tinggalam, baik hapi wan dumpit ulun nang basah,” jer Busu meambil hati nang mintuha.

Isuk arinya juwa, rahatan Busu mambuka lawang, takajut inya malihat TOYOTA ALTIS beparkiran di muhara rumah. Lalu si Busu mambuka lawangnya, ada tulisan di karatas sacarik, “Hadiah ini matan mintuha bini.” Liwar tu pang himungnya Busu. Lawas banar sudah handak beisi mutur. “Ampih dah aku makai DATSUN buruk nginih,” jer Busu sambil melihati mutur datsun nang biasa dipakainya gasan beangkut tanah.

Isuk arinya pulang giliran si Utuh Hirman nang dibawai ka pinggir sungai Kuin. Sidin mambawai ka Pasar Terapung. Rahatan di tangah sungai pas ada umbak ganal, pura-pura sidin ne becabur. Tapi si Utuh Hirman ne bediam haja kada handak menolongi, malahan beucap, “Rasakan pian, aur ulun ha disalahkan tarus.” Langsung Utuh Hirman ne mamutar jukung babulik ka wadah asal.

Isuk arinya juwa rahatan Utuh Hirman basiap-siap handak ka rumah mintuha handak acara panguburan, datang mutur MERCEDES BENZ SERI S CLASS 500 nang paling hanyar, lalu nang tukang atar manjulung karatas nang batulisan, “Ne Hadiah Matan MINTUHA LAKI, TARIMA KASIH, Susunyian ha kita lagi.”

Iklan

12 thoughts on “KISAH MINTUHA BINI

  1. Di Alabio itu banyak urang bahuma, siang mangatam, malamnya mairik banih. Supaya jangan ngantuk, masing-masing urang bakisah atau batatangguhan atau bakisah pengalaman nang urang jadi bingung. Nang saikung bakisah, mangomel sambil pura-pura manyangit wan tukang mambaiki TV, kenapa gambarnya tetap kada mau keluar. Jar tukang TV maka tadi sudah dicuba dihadapan ikam. Nang ampun TV tetap sangit sangit bapadah gambarnya kada mau keluar. Ha ha ha jar pembakal manangahi, mana ada gambar TV keluar, gambar tv dipandang haja.

  2. Julak anang Panting bingung mamikirkan sigaluh nang saikung ni, banyak nang badatang, mendam mamikirkan, akhirnya tetap kada mau. Ada nang badatang jujurannya selawi juta, ada nang handak manjujur duit ditambah saisi kamar, ada nang badatang handak manjujur duit, seisi kamar wan bulan madu ka jawa. Bingung Julak anang Panting, kenapa si aluh ni tetap kada mau. Pahabisan ada nang baakal, manjujur duit, saisi kamar wan saisi salawar. nah ………….. hanyar mau si aluh. Jar bini julak, pantas si aluh tu manating nating kan salawar gandum abahnya wan diaku.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s