MANGUHUP MI

MANGUHUP MI
Oleh: ‘el-Faroqy Noranie, Admin NSL-04

Julak Ijak ni baisian warung di kumplik sakulahan is-im-pi, sidin bajual macam-macam makanan ringan sampai nang barat. Banyak kakanakan sakulah ni bila istirahat ka warung Julak Ijak ni, tapi nang paling payu jualan Julak Ijak ni mi bakuhup, manganyangi pang.

Tiap hari tu sadusan labih habis mi ni di warung sidin tu. Bila pas jam istirahat abut sidin manguhupi mi karna banyak nang mamasan, maka sidin suranganannya manggawi, tapi mbahanu anak sidin manggini’i juwa, si Amang Kumba. Kada kasimbahan tangan tu pang.

“Mun kaya ini lucut kita bah ai,” jar Kumba.

“Badimapa pang lagi, naran gawian tu dijalani ai,” jar Julak Ijak.

“Kayapa bah mun parak istirahat kita kuhupi ja mi nya babanyak, jadi tinggal surung ja lagi, bah ai,” jar Kumba mausul.

“Bujur juwa, cardas ikam ni nak lah,” jar Julak Ijak.

Isuk harinya, pas parak istirahat langsung ai Julak Ijak ni manguhupi mi badus-dus. Sakalinya babunyi luncing pina labih pada nang rajin. Ihhhh sakali bulikan sakulahan, takana pas ulangan jadi capat bulikan.

“Jah bulikan kah sakalinya kakanakan, iya am ni barugian kaya ini, bahujung mi bangkak ja ni,” jar Julak Ijak tauling-uling kapala.