Wadai Kelepon (Kalalapun), Martapura


Kisah Asal Muasal Wadai Kelepon (Kalalapun)
Kisah Rakyat Matan Kabupaten Banjar, Martapura

Dikisahakan beasa ulih: Adum M. Sahriadi (Pambakal Sambang Lihum)

Wadai Kelepon, Martapura

Wadai kalalapun nang ada wayahini tu pamulaannya kada sama wan bahari, bulat-bulat, di dalamnya behinti gula habang. Mun sudah masak imbahtu diracahi parutan nyiur. Wadai nang kaitu jar urang Martapura ngarannya kelepon atawa kalalapun jar urang hulu sungai manyambat.

Kisah asal muasal wadai ne kaini:

Jaman bahari tu ada dua baranak nang hidup baduaan. Takesah umanya si anak rahatan garing. Sidin ne bakahandak handak mamakan wadai. Bahari tu kada kaya wayahini, bila handak maulah wadai banyak macamannya. Bahari mun meulah wadai cukup mambuat baras ka dalam lasung, imbahtu ditutuk, mun parak jadi galapung, lalu dibuati gula habang wan racahan nyiur nang halus-halus, imbahtu hanyar ditutuk (ditumbuk) pulang sampai likat. Mun sudah likat hanyar wadai nang ditutuk tadi diambil wan sinduk. Wadai nang kaya ne dingarani wadai masak lasung, rasanya nang kaya lamak-lamak manis wan nyaman.

Anaknya nang disuruh umanya maulah wadai tadi lalu manuju dapur. Imbahtu inya manjarang banyu di kuantan. Sambil mahadangi banyu masak, inya meambil lasung gasan manutuk lakatan gasan maulah wadai. Imbah lasung dibalik, takajut nang anak imbah malihat kala (kalajengking) di lasung nang handak dibarasihi.

Tagana nang anak antara takutan wan wani imbah malihat binatang tadi. Imbah lawas tadiam, si uma nang kadada mandangar si anak manutuk baras, lalu mangiyau, “Ui Luh! Lambatnya pang, nangapa nang kam gawi?”

“Hadangi satumat,” jar nang anak imbah takajut mandangar bihawan umanya. Nang badiam imbah mandangar nang anak manyahut. Tapi pina lawas kada tadangar jua nang aak manutuk baras. Lalu nang uma mambihau pulang, “Luh, banyu sudah manggalagak (maanggurak) di kuantan, napa maka ikam kada manutuk juwa?”

“Kalapun,” jar nang anak matan dapur. Bingung nang uma nangapa maksudnya kalapun. Si anak tadi sabujurnya handak mamadahakan wan umanya pada dalam lasung ada kala, makanya inya balum manutuk baras. Imbah tu capat-capat nang anak mambuang kala nang di dalam lasung tadi. Imbah tu inya mamasukkan baras lakatan ka dalam lasung, lalu bacapat manumbuk baras supaya kawa capat maulahakan wadai gasan umanya nang lawas mahadangi. Imbah tuntung manutuk, lalu galapung tadi diambilnya wan tangan sambil mangacak (manggumpal). Imbah bagumpal lalu dimasukakan ka dalam banyu di kuantan nang rahatan manggurak tadi. Galapung babungkal nang dibuat tadi lalu timbulan, imbah tu diangkat wan sinduk lalu dibuati ka dalam piring.

Imbahtu nang anak mahirisi gula habang wan mamarut nyiur, lalu dibuati ka dalam piring nang beisi galapung masak tadi. Imbah tu diudak wan sinduk. Imbah diudak, lalu di atasnya dihamburi nyiur nang baparut. Hanyar disurung wan umanya.

“Ma ne wadainya,” jar nang anak.

“Nah, kanapa maka jadi kaini wadainya?” jar nang uma. Lalu nang uma manyuap. “Ae, nayamnnya.”

“Kayapa ma, nyaman-kah?”

“Inggih nak ae, nyaman.”

Kada lawas mamakani wadai tu, datangan tatangga wan kulawarga nang handak manjanguk sidin nang garing. Imbah buhannya tadi masuk, lalu nang uma manyurungi wadai ulahan anaknya tadi.

“Coba rasai wadai nang diulah anakku, asa nyaman banar!” jar nang uma basurah wan buhannya nang datangan tadi.

Bubuhannya lalu marasai, “He eh, dasar nyaman leh,” jer buhannya. “Wadai nangapa ngarannya ne?”

Nang uma kaganangan anaknya manyambat kalapun waktu meulah tadi. “Kalapun!” jar nang uma.

Sampai wahini, wadai kalapun ne tarkanal kanyamanannya. Hanya haja dialek (pangucapan) urang-urang Martapura kada lagi manyambatnya kalapun, tapi kelepon. Sampai wahini urang matan dairah Banjar Kuala umpat manyambatnya kelepon, tapi urang Banjar Hulu manyambatnya kalapun, atawa kalalapun marga dalam bahasa Banjar Hulu kada tahu wan vokal (o).

Wahini, bentuknya wadai ne bulat. Gula habangnya dimasukakan ka dalam wadai manjadi hinti, lalu disusun sambil dihamburi nyiur baparut. Biasanya wadai nangini gasan ulih-ulih buhannya nang bulik ka hulu sungai, ka banua urang, wan ka mana haja marga kanyamanannya.

Kira-kira banyak haja nang bisa maulah wadai ne walaw kada bagana di Martapura, tapi rasanya asa balain pang. Mungkin haja bubuhan ibu-ibu nang ada di Martapura ada baisian resep lain nang dibuati ka wadai ne, nang kada dikatahui urang di luar.

Kisah ne masih hidup di padang ibu-ibu di desa-desa wan dairah di higanya.

12 thoughts on “Wadai Kelepon (Kalalapun), Martapura

  1. magun tampatan kami intang masigid tinggi(mesjid tinggi)bagan serai,malaysia.sambatannya kalalapon..banaran bahari berataan kamari begana/badiam intang sini tumatan warigin..demini palangkaraya.salam kakulaan.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s