KESAH BALAI KALIH


KESAH BALAI KALIH
Oleh: TumanggungArga Sandipa BatanggaAmas

Bahari kala di Pagunungan Maratus nang wadanya kira-kira diapit Gunung Tambung wan Gunung Mangkurung suah ada kampung nang bangaran Balai Tangga Amas. Bubuhan kula-kula kita nang ba’utu (begana) disia ti hidupnya damai, tantram, wan makmur bangat, sualnya di kampung Balai Tangga Amas tanahnya subur kada bataha kakurangan makanan. Kapala adatnya nang maatur disia ti bijaksana bangat jua. Kada hiran munnya paharatan Aruh Ganal, banyak bubuhan nang tumatan kampung subalah bailang umpat maramiakan, sualnya pasti banyak makanan nang kawa umpat dimakan.

Pas limbah katam, bubuhan urang kampung Balai Tangga Amas paharatan Aruh Ganal. Liwar banyak bangat bubuhan kampung subalah nang datang bailang. Ada nang umpat manyusunakan lamang, ada nang umpat manyumbalih hadangan, ada nang umpat batandik, ada nang umpat bakanjar, ada nang umpat bagandang, ada jua nang rami basalikur. Pukuknya rami bangat ti pang di kampung nitu. Saking kaasikannya bubuhan nang di kampung Balai Tangga Amas baaruhan, bubuhannya nitu kada tahu pang kada jauh dari kampung nitu Datu Sumali’ing lagi guring di atas puhun kariwaya nang ganal.

Bunyi gandang sing nyaringan babunyi maumpati bubuhan balian nang batandik. Magin lawas magin banyaring bunyi gandang nang dicatuk, sampai-sampai Datu Sumali’ing nang guring takajut mandangarnya.

Bakajutan Datu nitu tabangun. Matanya tabunceleng maitihi wan bacari muasal bunyi gandang nang nyaring nitu. Limbahnya nitu, Datu nang panyarikan nangini badiri sambil bakacak pinggang di atas puhun kariwaya nang ganal, lalu sidin bakuciak, “Bubuhan ikam ne tumbur wan gaduh bangat, maulah diaku kada kawa guring!” ujar Datu Sumali’ing bakacak pinggang.

Liwar takajutnya urang kampung nang lagi baaruhan nitu mandangar suara sing nyaringan. Lalu bubuhan nang ada di balai mamparapas kaluar maitihi nang bakuciak tadi. Magin takulipik bubuhannya nitu wayahnya tahu urang nang bahalulung tadi, limbahnya nitu, saikung bubuhan balian bapander maminta maaf. “Maafi kami, kami kada bamaksud mangganggu pian, kami paharatan aruh wan kami kada tahu pian lagi guring,” ujar saikung dari buhan balian nitu.

Lamun Datu Sumali’ing tatap karas wan tatap sangit bangat sampai-sampai habang muha sidin nitu. “Bubuhan ikam tahu luku wan diaku ne, siapa haja nang mangganggu diaku ne kada diaku ampuni tu pang!” ujar Datu Sumali’ing sambil talunjuknya manunjuki urang-urang kampung nitu.

Limbahnya baucap nang kaya itu, seerrrrr…. Datu Sumali’ing tarabang sambil mangaluarkan kajian sidin.. cchuuuhhhh…cchhuuuuhhhh… cchhhuuuuuhhhh…!!! Urang-urang nang ada di kampung Balai Tangga Amas saikung pada saikung diludahi sidin. Urang kampung kada-kada nang kawanya bukah wan mailak. Apa haja nang kana ludah sidin nitu, situ saini jadi batu. Urang kampung, binatang, gandang sampai balai adatnya nang kana ludah sidin barubah jadi batu. Limbahnya samuaan nang ada di kampung nitu manjadi batu,lalu sidin bakuciak pulang.

“Tumatan damini, kampung nang bangaran Balai Tangga Amas diaku alih manjadi kampung Balai Kalih! Hahahahaahaaa.,.” ujar Datu Sumali’ing sambil takihing bajalan maninggalakan kampung nang jadi batu nintu.

Kampung Balai Tangga Amas atawa nang talah baubah ngaran manjadi Balai Kalih nitu, damini masih ada. Di sana ada batu nang ganal bangat, ujar tatuha kampung Buhul, batu nang ganal nitu balai adat Tangga Amas nang kana ludah Datu Sumali’ing. Dahulu, urang-urang kampung nang maliwati batu nitu musti mambari tanda atawa tulisan di batu nitu gasan mahurmati urang kampung Balai Tangga Amas nang sudah jadi batu. Di atas batu nitu ada lagi batu nang tagantung, ujar habar batu nitu gandang nang kana ludah Datu Sumali’ing jua. Ada jua batu nang kaya urang paharatan manyusui anaknya, ada jua batu nang kaya payau wan bayi (babi hutan), wan masih ada lagi batu-batu nang kaya manusia ada di sana. Urang-urang kampung nang parak situ parcaya batu-batu nitu dulunya urang kampung Balai Tangga Amas, binatang-binatang, wan banda-banda pakakas aruh nang kana ludah si Datu Sumali’ing.

Damintu kesah Balai Kalih
Ampun maaf bila ada kurang wan labihnya.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s