PAMAINNYA BABANYAK


PAMAINNYA BABANYAK
Oleh: Roni Race Batola

Wayah bulan puasa nangini di kampung Ujal kada katinggalan jua hibuh partandingan main bal liga campion, ada nang imbah sembahyang tarawih langsung guring wayah tangah malamnya bangun langsung manuntun main bal sambil basahur ada jua nang kada baguringan sambil bagarakan sahur. Tapi kada samunyaan rumah baisian tivi, tamasuk jua Ujal kada baisian tivi. Maka malam itu Ujal tapaksa umpat manuntun ka rumah Idar.

“Aku malam tadi manuntun main bola siaran tivi itu di rumah Idar tapi kada puas,” ujar Ujal wayah isuknya bapander wan Anan.

“Kanapa maka kada puas Jal, apakah karna kabanyakan nang manuntunnya lalu kada kadangaran suaranya,” ujar Anan.

“Aku nang hiran banar, rupanya partandingan bola piala campion ini pamainnya banyak banar. Padahal, biasanya dua kasabelasan itu jumlahnya nang main di lapangan jadi 22 ikung tapi ditivi Idar itu jumlahnya jadi banyak banar,” ujar Ujal.

“Nang ngarannya main bal Jal ai, di mana haja di dunia ini tatap sabalas ikung kada mungkin labih, nang mungkin kurang haja jumlahnya karna kana kartu habang. Nah, itu Idarnya datang, bujurlah Dar pamain balnya banyak banar di siaran tivi ikam itu,” ujar Anan.

“Kada usah mahina Jal ai, buruk-buruk tiviku masih ada gambarnya walaupun bahanu tabanyak hintalu iwaknya daripada pamainnya atawa muhanya pirut kaya urang sakit gigi. Bujur haja pamainnya babanyak karna antinanya kada mau pas andaknya, jadi gambarnya babayangan tarus. Saikung jadi dua dan nang dua jadi ampat, makanya jumlah gambar pamainnya banyak banar,” ujar Idar mangakui.

“Nah Jal, sudah tahu kalu alasannya. Pamain balnya tatap haja sabalas ikung tapi gambarnya nang babayangan,” ujar Anan.

“Sabujurnya aku paham haja, cuma handak manyindir Idar supaya antina tivinya diganti wan nang baik, jangan tutup panci itu lagi,” ujar Ujal kada hakun kalah.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s