100 Ribu Harga Kupiah Buruk


100 Ribu Harga Kupiah Buruk
Oleh: Roni Race Batola

Wayah handak tarawihan malam samalam, Ujal wan kakawalannya bajanjian tulak ka langgar baimbaian.

“Dar, lajui kita tulakan sambahyang tarawih,” ujar Ujal wan Anan mambawai Idar.

“Hi,ih lah, kada karasaan sudah saparu labih kita puasaan, padahal rasa hanyar haja,” sahut Idar.

“Rasa hanyarai amun kada pernah pamuasa,” ujar Ujal.

“Ayu lakasi kita tulakan kaina kada kabagian saf nang dimuka,” ujar Anan.

“Sudahkah baudhu Jal?” ujar Anan.

“Kaina baudhu di masigit haja, banyunya jaranih,” sahut Ujal, lalu bubuhannya tulakan ka masigit.

“Urangnya banyak Jal ai, kita bagilir haja baudhu. Bila ada krannya nang puang lakasi haja ikam masuki,” ujar Idar.

Kada lawas ba-antri lalu ada kran nang puang, Utuh Ujal langsung mamacul kupiahnya, manyangkutakan di paku nang basusun di tawing paudhuan itu.

“Sudah tuntungkah Jal, ayu baganti,” ujar Anan.

Imbah tuntung sembahyang tarawih, bubuhannya bulikan dan singgah nginuman di warung acil Enor.

“Napa kupiah ikam pina bahanyar Jal, pina kadada lagi tahi lambuannya,” ujar Idar.

“Astaghfirullah… kupiahku tahurup wan siapa?” ujar Ujal sambil manjapai kupiahnya, lalu mamacul dan mahahar lipitannya. “Astaghfirullah… dasar bujuran tapahurup! Pasti kupiahku tapahurup wayah baudhu tadi,” ujar Utuh Ujal sambil pina maingatakan langsung bukah babulik ka masigit.

Lawas Ujal maninggalakan bubuhannya babulik ka masigit, kurang labih saparapat jam hanyar inya cangul pulang.

“Kaya apa Jal tatamu lah kupiah ikam?” ujar Anan manakuni.
“Kadada lagi Nan ai, aku cari kasana kamari tatap kada batamuan wan urang nang tapakai kupiahku,” ujar Ujal sadih.

“Biar haja tapahurup Jal ai karna kulihat kupiah ini jauh labih hanyar dari ampun ikam nang batahi lambuan wan babau masam itu,” ujar Anan.

“Ihlasakan haja Jal ai, nyata sudah untung iakm,” ujar Idar.

“Kada kawa di,ihlasakan Dar ai, biarpun kupiahnya bahanyar dan babaik daripada kupiahku, ampunku itu larang ratusan ribu,” ujar Utuh Ujal.

“Kupiah buruk ikam itu sajampal kada payu,” ujar Anan mamahapak Ujal.

“bujur haja kupiahnya buruk tapi… tapi di sasala lipitannya ada duitku lambaran ratusan ribu rupiah,” ujar Utuh Ujal sadih sambil handak manangis

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s