SAPI GILA (Serial Utuh Ujai)


SAPI GILA (Serial Utuh Ujai)
Oleh: Adum M. Sahriadi

Hari itu di SMA Sambang Lihum kalas 3 riuh buhannya barucau kada karuan tampuh. Hari itu juwa kabalujuran rahatan palajaran Bahasa Indunisia nang diajari ulih Guru Apur. Buhannya rami mambahas palajaran wawancara, handak jadi wartawan jar. Singkat kisah, buhannya ne dibari tugas mawawancarai urang-urang di kampung. Timpunya saminggu. Bubuhan Utuh Ujai rapat di rumah manantuakan siapa nang patut diwawancarai. Lalu jar Aluh Dangkik, “Kayapa am mun Utuh Kacipu kita wawancarai? Jar habar, sapi sidin nang banyak tu ada nang gila.”

“Akur!!!” jar buhannya barataan. Lalu ditatuakan waktunya. Imbah tu buhannya mandatangi Utuh Kacipu nang lagi malalahakan sapi parah ampunnya.

“Assalamualaikum Amang Kacipu? Kayapa habar?” jar Utuh Ujai manakuni.

“Baik banar nah, napa habar pina rame ka wadahku, ada nang babagi jakat kah pulang?” jar Utuh Kacipu.

“Kadada Mang ae, kami kasia ne handak balajar jadi wartawan, disuruh guru di sakulahan. Kabalujuran sapi parah pian ada nang gila jar, jadi kami manakunakan nintu!” jar Adum Halus manjalasan.

“Tu sapinya,” jar Utuh Kacipu sambil manunjuk ka sapi nang gila.

“Mang, kanapa sapi bisa gila? Masyarakat awam nang kaya kita ne sudah rancak mandangar anjing gila ataw rabies, mun sapi gila, hanyar ini?” jar Adum Halus gaya wartawan prupisiunal juwa.

“Nah, diaku ne gawian bagaduhan sapi ja, Dum ae, lain duktur hiwan. Diaku ne kada tahu juwa kanapa sapi bisa gila,” jar Utuh Kacipu.

“Ah, paman ne sudah puluhan tahun bagaduh sapi parah, asa kada mungkin kada tahu sama sekali nangapa sababnya,” jar Aluh Dangkik gaya wartawan nang handak maintrugasi urang.

“Bujur haja pang sudah puluhan tahun, tapi kajadian ne hanyar ja suah maalami,” jar Utuh Kacipu masih santai.

“Jujur haja pang Mang, walau naya kasus nang panambayan, satidanya pian sudah rancak mandangar panyuluhan, kan? Bisa sako pian kada tapi manjagai sanitasi atawa gizinya. Atawa juwa karancakan mauplus babarang makananan supaya mahimat ungkus pruduksi. Masyarakat luas jangan dikurbankan, Mang ae! Produksi gaduhan pian ne kan susu,  cagaran banyak dikinum ibu hamil wan balita. Kan babahaya dong mun pian babarang haja,” jar Utuh Ujai nang badiam haja matan tadi.
Sakalinya Utuh Kacipu ne asa tasinggung mandangar tatakunan nang kaya manuduh ka inya. Lalu Utuh Kacipu manjawap nang kaya urang prupisiunal juwa, “Begini, kalau hanya dengan pengalaman, saya tahu penyebabnya cuma dua. Pertama, sapi perah kawin hanya satu kali dalam setahun, dan kedua, sapi perah diperas puting susunya dua hingga tiga kali sehari”.

“Oh, begitu ya? Tapi bagaimana semua itu bisa menyebabkan sapi menjadi gila?” jar Adum Halus kada mau kalah babahasa.

“Ya coba saja anda bayangkan sendiri. Bagaimana kalau kuwitan laki anda memeras-meras puting susu kuwitan bini dua hingga tiga kali sehari, tapi ‘mengawini’ kuwitan bini hanya setahun sekali, apa anda nggak jadi gila juga tuh?” jar Utuh Kacipu balalu bajauh nang gaya tasinggung.

One thought on “SAPI GILA (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s