BADATANG (Serial Utuh Ujai)


BADATANG (Serial Utuh Ujai)
Oleh: -Tuan Muda Busu Wahyu, Banjarmasin

Malam Jumahat Amang Ijun urang hanyar di kampung Jingah Rabit ne disuruh pacarannya badatang, sakira malam salikur kawa nikah, embah hari raya 2 hari kawinan jar. Bingung Amang Ijun ne, duit kadada balum, handak manyandakan pahumaan katiya balum ngataman lagi. Maka ujar pacarnya, “Mun pian lambat badatang, ulun ne pacangan dikawinakan abah wan anak bos kalapa sawit.”
Mandangar kayato, amukai Amang Ijun ne bulik ka rumah. Piring dihampasi, tilam disalukut. Malihat nang kayatu, lalu ae nang kuwitan ne manakuni. “Sabar Jun, nangapa garang kahandak ikam?”
“Abah handak rugi ganal kah, rugi halus kah?” jar Amang Ijun manyambungi.

“Ae, kada handak pang rugi. Kisahakan dahulu, jangan bahahancur kaeni!”

“Mun abah handak rugi ganal, rumah ne kusalukut. Tapi mun handak rugi halus, datangakan/para’akan aku wan Aluh Imut!” jar Amang Ijun sambil maandak ka teng binsin nang siap dikubuyakan ka rumah.

“Aluh Imut nang mana?” jar abahnya pulang.

“Aluh Imut nang urang subarang tu pang. Anaknya Su Ijak bos baras,” jar Amang Ijun manjalasakan.

“Ayuha mun kaitu, malam ne kita badatang. Ikam barapa ada baduit?” jar abahnya.

“Duit nangapa? Lain pada Mio Sul tu ha kujual,” jar Amang Ijun.

“Ayuha, kaina abah manambahikan munnya kada larang jujurannya.”

Lalu pas malam Jumahat badatang ae dua baranak ne ka wadah Su Ijak. Pandir ka pandir, lalu ujar kuitan babiniannya akur haja mun handak wan anakku. Lalu jar kuitan biniannya, “Mun malihat wayahni banda sarba larang, kayapa am mun kami maandak jujurannya?”

“Berapa pian meandak?” jar abahnya Amang.

“Kayapa mun 35 juta, kawa haja turun saikit,” jar Su Ijak.

Takajut ai Amang Ijun wan abahnya mandangar saitu. Dalam hati Amang, “Cadangan tasanda pahumaan dua borongan, kambing tajual, mio tajual, tatap haja kada mayu, tinggal baharap di abah ae lagi kalu kawa manambahiakan.”

“Kayapa? Jadi wan akur hajakah?” jar Su Ijak pulang, dalam hati Su Ijak, “Mun urang mahakuni kawa juwa mangganti sapida motor alpa wan Satria F.”

“Mun kaitu kami kada manawar lagi?” jar abahnya Amang Ijun.

“Bearti jadi wan akur haja mun kaitu,” jar abahnya Aluh Imut.

“Kada, maksud kami kada manawar lagi tu, kami bapikir bulikan ae lagi,” jar abahnya Amang Ijun.

2 thoughts on “BADATANG (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s