JAM BABUKA PUASA (Serial Utuh Ujai Versi Ramadhan)


JAM BABUKA PUASA (Serial Utuh Ujai Versi Ramadhan)
Oleh: Pambakal Jingah Rabit

Takisah waktu Utuh Mandaw lagi halus. Waktu itu rahatan bulan Ramadhan, Utuh Mandaw ne kada sabar lagi mahadangi waktu babuka puasa. Maklum kakanakan, takana saparu puasanya, takananya tuntung sabigian puasanya. Hari nintu Utuh Mandaw ne bepadah wan abahnya, “Bah, magribnya jam barapa garang?”

“Jam 6, sabar ae, masih 4 jam lagi,” jar abahnya pina santai.

“Kanapa lawasnya, mulai tadi ulun lihati jam, jam 2 ha tarus!” jar Utuh Mandaw.

“Nah, kanapa pang mun jam 2?” jar abahnya.

“Ulun handak capat babukanya, pina kuriakan gaduhan ulun dalam parut dah,” jar Utuh Mandaw, “Kayapa mun kita putar haja jamnya ka jam 6?”

“Tasarah ikam ha!” jar abahnya.

“Asyik!” jar Utuh Mandaw sambil badiri maangkat kursi handak maubah jam ka jam 6. Imbah sudah dipindah ka jam 6 lalu baucap ae, “Bah, sudah ulun ubah ka jam 6, lakasi kita bukaan!”

“Nah, nintu hanyar jam di dapur, balum jam di ruang tamu wan ruang tangah lagi,” jar abahnya.

Badadas Utuh Mandaw mamindah jam di ruang tamu wan ruang tangah ka arah jam 6. “Bah, sudah sunyaan ulun pindah jamnya ka jam 6!” jar Utuh Mandaw pina kahimungan kaarayan.

“Ha ha ha, nintu hanyar di rumah kita, balum lagi jam di rumah tatangga kita. Pindahi dahulu jam di rumah Pambakal, di rumah Utuh Ujai, di rumah Su Ijak, di rumah Su Runi, di rumah Wanbuy, di rumah Duktur Apam, di rumah Amang Ijun, di masigit, di sakulahan Sambang Lihum, wan sunyaan di kampung kita,” jar abahnya pina kukurihing ha malihati kalakuan anaknya.

“Kanapa maka kaitu, bah?”

“Mun kada kaitu, sunyaan kada kawa buka puasa,” jar abahnya.

“Umai uyuhnya, mun kaitu baik ulun nunggui haja gin jam 6 nya,” jar Utuh Mandaw.

“Makanya am,” jar abahnya.

Lalu abahnya maninggalakan guring Utuh Mandaw, tapi Utuh Mandaw ne langsung bajalan ka luar mambawai buhan Adum Halus, Utuh Ujai, si Enor, wan Utuh Ujal gasan maubah jam ka jam 6. Kada lawas, kira-kira jam 4 an, babunyi dauh di masigit Kampung Jingah Rabit. Bubuhan kakanakan mancatukinya. Ada nang rahatan lagi bamasak, langsung babuka, ada nang takajut-kajut imbah bangun guring langsung minum. Pokoknya gigir tu pang kampung. “Napa yu maka hari masih tarang, tapi jam di rumah sudah jam 6,” jar nang lain.

“He eh, bisa parak kiamat sako, pina ubah hari,” jar nang lain pulang. Habut urang sakampungan ka langgar, handak sumbahyang tobat wan baamal sabanyak-banyaknya. Kurihingan kakanakan nang mancatuki dauh tadi.

One thought on “JAM BABUKA PUASA (Serial Utuh Ujai Versi Ramadhan)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s