DOA ALUH DANGKAK (Serial Utuh Ujai)


DOA ALUH DANGKAK (Serial Utuh Ujai)
Oleh: Adum M. Sahriadi

Imbah kawin wan Aluh Karamunting, Utuh Hirman ne kada lawas baisi anak babinian nang imut. Cuma nang anihnya hanyar 9 bulan kawin sudah baanakan. Utuh Hirman mangarani anaknya Aluh Dangkak, napa mun waktu malahirkan, bininya rahatan badangkak maniup api, pungggg…, malacung anaknya kaluar. Wahini Aluh Dangkak umurnya sudah 4 tahunan. Inya sakulah TK Sambang Lihum.

Rahatan malam, rarangunan inya mandangar anaknya bado’a rahatan handak guring. “Tuhan, lindungiakan umaku, lindungiakan abahku, wan tarimalah kaiku.” Antah kabalujuran atawa kayapa, isuknya maninggal kainya si Julak Jabuk maninggal dunia.

“Bujur-bujur anih, kanapa pina pas do’a anakku malam tadi,” jar Utuh Hirman. Kada sawat baganti bulan, hanyar dua kali ahad, tadangar pulang Aluh Dangkak badoa, “Tuhan, lindungiakan umaku, lindungiakan abahku, wan tarimalah niniku.” Isuknya dasar bujur juwa, nininya maninggal dunia.

”Astaghfirullah…!” jar Utuh Hirman, “Bearti anakku ne harat bapandir wan urang subalah atawa urang gaib. Ne bisa baisi kabisaan jadi tukang tatamba,’ jar Utuh Hirman pina kagum wan bingung.

Imbah kajadian nintu, kada suah lagi si Aluh ne badoa. Sudah 3 bulan, kada suah tadangar lagi. Napa kah hari itu Utuh Hirman bulik bagawi mangayu di hutan, awak lapah, kabalujuran pulang inya dipatuk tadung. Wayah di rumah inya mandangar pulang anaknya bado’a, “Tuhan, lindungiakan umaku, wan tarimalah abahku.”

Asa ditimbak patir Utuh Hirman ne, langsung balilihan banyu mata. Kada pikir panjang, kada sawat istirahat lagi, ambil tapih wan sajadah, imbah baudu langsung sumbahyang tobat. Sunyaan sumbahyang sunat digawinya. Parak jam 12 malam, baganti pulang mambaca Yasin, imbah tu jam 3 sumbahyang tahajud sampai subuh. Isuk subuhnya pulang kadada apa-apa. Bagamat banar inya bagawi, takutan kalu sampai umur. Handak turun ka lanting bahira haja pina racap jikir, takutan kaluku tagugur atawa disambar buhaya.

Imbah naik di lanting, baudu pulang sumbahyang tobat wan duha. Pukuknya kada mangaruan tu pang pikiran. Asa pina ngantuk mata, lalu maulah kupi. Kada tanggung-tanggung, sasinduk kupinya, sasinduk gulanya, sasinduk bacampur uyah. Cagat mata. Di tangan kada lapas tasbih, bila tatamu urang barilaan dunia ahirat. Pukuknya bingung urang malihat sampai ada nang baucap, “Babulik pulang sako kawan ne ka Sambang Lihum bahari.”

Imbah jam 1 siang kadada papa. Imbah sumbahyang juhur, tadangar kaum di masigit pangumuman, “Innalillahi wainnailaihirajiun, telah berpulang ke rahmatullah, nama Angah Sambur bin Kai Isal. Jam 1 liwat 12 manit di gawiannya.”

Langsung marigap hati Utuh Hirman malihat bininya Aluh Karamunting balilihan banyu mata. “Luh, aku handak bepandir wan ikam, siapa sabujurnya Angah Sambur? Aku hari ini kada sawat baapa-apa, asa pina sampai ka ahirat sudah.”

“Maapi abahmu lah, ulun kada wani bapandir,” jar Aluh karamunting.

“Pukuknya, napa haja salahnya aku maapi ikam,” jar Utuh Hirman.

Lalu nang bini babisik wan Utuh Ujai di higa, “Padahakan wan abahmu pada sabujurnya Aluh Dangkak tu lain anaknya.”

Langsungai Utuh Ujai manyampaiakan pasan lawan Utuh Hirman sama nang disampaiakan Aluh Karamunting.

“Jah, jadi siapa anakku, siapa juwa Angah Sambur?”

6 thoughts on “DOA ALUH DANGKAK (Serial Utuh Ujai)

  1. ssipp….kisahnya ni, coba am jua dipublikasikan diBanjarmasin Post, jadi orang tahu bahwa Orang Banjar to banyak ba’isi kisah, kada cuma kisah “Palui” haja.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s