AKU SUDAH TAHU SAMUANYA(Serial Utuh Ujai)


AKU SUDAH TAHU SAMUANYA(Serial Utuh Ujai)
Oleh: Adum M. Sahriadi

Di SMA Sambang Lihum nang paling cariwit di kalas adalah Si Enor, anaknya Utuh Runi. Takisah hari itu inya curhat wan Utuh Ujai. “Jai, kayapa yu caranya supaya nyaman dapat duit?”

Jadi jar Utuh Ujai, “Kaini Nur ae, satiap ikam bapandir wan urang di rumah, mulai wan mantra nginih: ULUN SUDAH TAHU. Aku rancak banar dah manggawi di rumah, pastiI dapat duit.”

Himung si Enor mandapat mantra hanyar tu. Kabalujuran juwa Enor ne tamasuk urang sugih. Tapi jarang disangui duit ulih abahnya. Bila inya tulak ka sakulahan pasti sudah siap rantang nasi, banyu teh dalam butul, wan karupuk. Itu pang sanguannya bila ka sakulahan. Jadi inya ne handak banar baduit nang kaya kakawanannya, supan juwa mun ditraktir Utuh Ujai tarus makan pintul paman Ipan.

Sampai di rumah Enor langsung praktik lawan mantra hanyar ne. Pamulaan inya maambil HP Nokia 95 nya. Lalu manalipun Aluh Mining, kawannya di SMA. “Luh, aku sudah tahu samuanya!”

“Hah!” tadangar suara Aluh pina lamah. “Nur, kam jangan mangisahkan wan Iyank mun aku sumalam bajalanan wan pacarnya lah? Aku ada baisi tikit gasan manuntun filim, kena kubarikan wan ikam. Kayapa?”

“Beres!” jar Enor kaaraian sambil manutup tilpun. “Dasar harat mantra Utuh Ujai ne,” jar Enor pina gagarunum dalam hati. Imbah tu inya langsung bajalan ka kamar kakanya, pas kakanya rahatan barabah sambil mandangarkan lagu Bung Ruma nang bajudul Kahilangan Tungkat. “Ka, aku sudah tahu samuanya,” jar Enor mambisiki di talinga kakanya.

Langsung bangun kakanya mamatii ka musik, imbahtu maambil kunci mio lalu manjulung wan Enor. “Nah Nur, ikam bulih mambawa sapida kaka samingguan, kena kuisikan tarus bensinnya bila habis. Tapi ingati, jangan bapadah wan abah lah pada aku rancak maambil duit?”

“Beres!” jar Enor himung banar. Langsung Enor kaluar. Pas rahatan mahidupi mio, abahnya datang bagawi. Kada jadi Enor mahidupi. Langsung baparak wan abahnya, “Bah, ulun sudah tahu samuanya.”

“Nah am, ikam jangan bapadah wan mama ikam. Kena tarbangan piring. Nih duit 500 ribu. Ingatilah, ikam jangan bapadah pada abah rancak mangupi di warung Diang Langkar,” jar abahnya pina bagamat-gamat pandir.

“Beres,” jar Enor. Pas waktu Enor sampai kaluar pagar, inya tatamu paman satpam nang biasa jaga malam di rumahnya. Maklum urang sugih. Timbul pulang akalnya handak mambajak paman satpam ne. “Paman, ulun sudah tahu samuaanya.”

“Alhamdulillah. Ahirnya tahu juwa. Sudah lawas aku mahadangi nginih. Sini nak, peluk abahmu ne. Abah lawas banar sudah handak bapandir wan ikam pada ikam tu anak paman. Ahirnya abah ikam nang di rumahtu mangisahakan juwa siapa ikam. Mulai halus ikam kutitipakan. Abah kada baisi duit gasan mangganalakan ikam,” jar paman satpam sambil balilihan banyu mata kaaraian.

Iklan

2 thoughts on “AKU SUDAH TAHU SAMUANYA(Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s