BAWASIAT (Serial Utuh Ujai)


BAWASIAT (Serial Utuh Ujai)
Oleh: Adum M. Sahriadi

Julak Jabuk adalah urang nang paling tuha di Kampung Jingah Rabit. Hari itu inya garing bangat, lalu inya mangiyau anak-anaknya. Habut urang maingat-ingatkan siapa anak-anak Julak Jabuk.

“Rasanya, Utuh Hirman tu anak sidin juwa matan bini Acil Kurihing,” jar urang di balakang.

“He eh, mun kada salah Su Runi tu anak sidin juwa matan bini Diang Udah,” jar nang lain.

“Satahuku pambakal tu anak sidin juwa matan bini Aluh Kamut,” jar pangulu nang tamintang ada di situ juwa.

“Uuuu banyaknya,” jar Acil Munah, “bearti batambah pulang tu matan adingku si Wanbuy, inya anak sidin juwa.”

“Nah am, dahulu aku suah takumpul di warung, sidin ne bakisah anak sidin nang bajumlah anam ikung. Baarti tadi sudah baampat, jadi duanya si Su Ijak wan Amang Ijun. Su Ijak tu anak matan bini Julak Carniah. Amang Ijun tu anaknya matan bini…., kada ingat lagi nah, siapa yu nang madam ka banua Amirika sumalam?” Jar Angah Ibat.

Langsungai tumbur buhannya mancarii nang baanam ne. Kabalujuran sunyaan bagana di kampung ne haja. Kada lawas datang pambakal wan anaknya Adum Halus. Imbah tu datang Su Runi wan anaknya Si Enor. Bairingan wan sidin datang juwa Utuh Hirman wan anaknya Utuh Ujai. Kada tapi lawas datang Su Ijak wan anaknya Utuh Ujal. Bairingan pulang, datang Wanbuy wan Amang Ijun.

Gigir buhannya, takajut badangsanak kada katahuan. Imbah takumpulan lalu buhannya mahadap abahnya Julak Jabuk. Julak Jabuk ne dasar tukang kisah juwa di kampung, urangnya lucu banar, handak mati haja sawat balucu.

“Kaeni kakanakan lah, abah ne parak sudah umur. Jadi abah ne handak bawasiat. Tanah nang ada di higa kantur Bupati, nang di higa masigit, nang di higa Pasar Amuntai, di higa Pasar Kalua, wan di higa pasar Rantau, JANGAN DIJUALI!”

“Ingatilah, buhanmu hakun haja bajanji kalu?”

“Inggih Bah ae,” jar buhannya tapaimbai.

“Kanapa Bah maka kada bulih dijual?” Jar Utuh Hirman manakuni.

Takurihing Julak Jabuk. “Kanapa maka kada bulih dijual, karna tanah nintu lain ampun abah. Sabujurnya aku handak mangumpulkan buhan kam di sini supaya bapinanduan.”

Tanganga buhannya barataan.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s