IPULUSI HANTU DRAKULA (Serial Utuh Ujai)


IPULUSI HANTU DRAKULA (Serial Utuh Ujai)
Oleh: Adum M. Sahriadi

Naya handak mangisahkan kawan hanyar Utuh Ujai, ngarannya Amang Ijun. Amang Ijun ne ngaran aslinya John Kenedy. Inya ne tamasuk urang pintar di kampung Jingah Rabit. Kanapa maka pintar, inya haja nang kawa sakulah jauh kaluar nagri, jar habar ka banua Amirika. Inya hanyar ja badiam di kampung Jingah Rabit, marga matan halus bagana di banua subalah.

“Ayu pang mang, kisahakan nangapa kisah nang rame di banua urang situ?” Jar Utuh Ujai manakuni.

“Nah am, kisah napa yu?” Jar Amang Ijun pina bapikir. “Kaeni haja, aku handak mangisahakan hantu di sana, ngarannya drakula, kayapa am?”

“Akur, pas banar tu. Kayapa garang hantu di situ?” Jar Adum Halus umpat manyambungi.

“Kaini kisahnya. Jaman bahula bahari, urang di sana takutan banar lawan nang ngarannya drakula. Drakula ne katuju maisap darah manusia khususnya babinian. Inya bataring kaya harimau, tapi wayah ne drakula hudah punah di sana.”

“Beh, bearti bubuhannya sana sakti-sakti banar mang lah,” jar Utuh Ujal anaknya Su Runi manakuni.

“Kada kaitu pang. Kisahnya maka hilangan pada banua tu asalnya gara-gara inya lagi maisap darah bini urang, pas katahuan nang laki. Lalu nang laki mambawa tukul wan paku, langsung mamaku kapala drakula. Langsung mati drakulanya. Nah imbahtu inya masuk ka parsidangan ahirat (manurut kaparcayan urang situ).

“Uuu Raja Ahirat, ulun muhun hidup pulang, jadi barii ulun kasampatan hidup pulang, nang panting ulun kawa maisap darah!”

“Saya kabulakan kahandakan ikam, ikam kada lagi jadi drakula, tapi jadi kalalawar tukang isap darah,” jar Raja Ahirat.

Ahirnya drakula baubah jadi kalawar. Lagi asyik maisap darah, datang pamburu nang langsung manimbak. Imbah tu tabulik pulang inya ka ahirat. Kaitu pulang kisahnya, ahirnya inya baubah jadi nyamuk.

Rahatan asik maigut darah Pambakal Jingah Rabit nang tadahulu, TAPUUUK, ditapak pambakal langsung dipirik pambakal jadi daki. Babulik pulang kisahnya ka ahirat.

”Nah, ikam pulang kah nang dating?” Jar Raja Ahirat.

“Inggih, Tuanku ae. Ulun mati tarus, adakah lagi cara supaya ulun hidup pulang, tapi kada bamatian lagi. Sakali ne haja lagi ulun muhun,” jar drakula te.

“Baiklah, mun kaetu kukabulakan kahandakan ikam, tapi ne nang tarahir haja,” jar Raja Ahirat.

“Tarimakasih Paduka ae, jadi nangapa ulun?” Jar Drakula.

“Ikam JADI…..
JADI…..
JADI….
JADI…..
IKAM KUJADIKAN PAMBALUT BIBINIAN ATAWA SUPTEKS.”

“Nah kaetu kisahnya, makanya drakula kada baampihan lagi maisap darah babinian, wan inya kakal sampai kiamat kina kada bamatian lagi,” jar Amang Ijun manutup kisahnya. Tanganga-nganga buhan Utuh Ujai, Adum Halus, wan Utuh Ujal mandangari.

Iklan

8 thoughts on “IPULUSI HANTU DRAKULA (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s