PAMULAAN KA BANJAR (Serial Utuh Ujai)


PAMULAAN KA BANJAR (Serial Utuh Ujai)
Oleh: Adum M. Sahriadi

Utuh Ujai ne dibawai abahnya ka Banjar. Bangaran kada suah lalu ka kota, himung tupang utuh ne. Lawan jua bangaran Kampung Jingah Rabit ne jauh pada kota, jadi jarang-jarang tadapat hiburan nang rame. Padahal mun manurut kisah abahnya, tutuha Jingah Rabit barataan baasal matan (lapasan) Sambang Lihum alias RSJ nang dahulu andakannya di Kayutangi Ujung, Banjarmasin. Hanyar bamula malam, Utuh ne habut manyusuni baju ka dalam tas. Utuh Hirman abahnya Utuh Ujai tatawa malihat kalakuan utuh ne, “Jangan banyak-banyak Tuh ae mambawa baju, kita esok satumat juwa ka Banjar, malamnya kita sudah di sini!”

Isuk harinya, tulakan ae ka Banjar. Sampai di Banjar, kabalujuran parut pina lapar. Lalu Utuh ne dibawai abahnya ka KFC. Rahatan asyik makan, kada lawas datang kai-kai wan nini-nini nang masuk pina masra banar urangnya. Lalu baduduk di subalah buhan utuh. Mun manurut panglihatan Utuh, kada kurang 70-an umur nang kai-nene ne.

Nang kai mairit (manuntun) nene bajalan. Imbah tu nang kai mamasan badiri mamasan makanan, sabiji hamburger, saporsi kentang goreng. Imbah tu nang kai hati-hati banar mambagi sama pamakan ne. Utuh Ujai maanyaki malihat kalakuan nang badua naya. “Nangini ne nang patut dicuntuh, tuha-tuha masih haja mau babagi wan saling mangasihi,” jar Utuh Hirman dalam hati sambil kagum malihat nang badua ne. Kada lawas nang kai ne badiri pulang maambil minuman sacangkir, tapi sadutannya dua buting. Jadi buhannya ne minum sacangkir badua.

Kada lawas nang kai mulai makan bagiannya nang sudah dibagi tadi, nang nene ne badiam haja malihati tapi kada umpat makan. Lalu Utuh Ujai nang urangnya pamarasan wan urang mandatangi sambil manawari kentang goreng ukuran Super Size. “Kai, ambil ha ngini, ulun kada habis juwa mamakan!”

“Kada usah cu ae, kami tabiasa sudah bagi dua satiap ada pamakan,” jar kai-kai tadi.

Tuntung kai tadi makan, ma lap muntung wan tisu, nang nene tatap haja manunggui, kada manggatuk sadikit haja pamakan di hadapan. Badiri Utuh Hirman, “Ne, pian handak makan apa, kalu pian kada katuju makanan ne!” Jar Utuh Hirman manawari nang nene.

“Kada usah Nak ae, tarimakasih, kami babagi nang ada haja” jar nene ne.

Lalu nang kai minum banyu, nang nene tatap badiam haja. Bingung Utuh Hirman wan Utuh Ujai, kanapa nene ne kada makan lalu, bila ditawari kada hakun, babagi nang ada haja jar. Badiri pulang Utuh Hirman mamaraki nang badua ne, “Ulunkah kai nang mamasanakan gasan nene, kasian nene kada makan.”

“Kada usah nak ae, nang ada ne cukup haja,” jar kai.

“He eh, tarimakasih haja nak ae, nang ada ne cukup haja,” jar nene ne pulang.

“Mun kaitu, kanapa makanannya kada dimakan, jar sanang babagi badua?” Jar Utuh Hirman.

“Ohh….,” jar nene sambil takurihing, “Ulun ne lagi manunggui gigi kai, kami bagantian gigi gasan makan,” jar nene.

Tapakalah Utuh Hirman sambil duduk pulang baasa di wadah asal.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s