WANBUY HANDAK MINTA NAIK GAJIH


WANBUY HANDAK MINTA NAIK GAJIH
Oleh: Adum M. Sahriadi

Wanbuy ne bagawi di parusahaan sawit. Pas rahatan banyak kaparluan Wanbuy ne kadada akal lagi handak bacari duit. Paribasanya biar disuruh urang manjapai tahi lancung gin hakun, asal jadi duit. Jadi jar Pambakal, “Cubai pang Buy, kam bapadah wan bos kam di parusahaan minta naikkan gajih, kam pagawai lawas juwa kalu!”

Ahirnya Wanbuy ne manuruti saran nang dibari pambakal. Isuk harinya, subuh banar inya sudah ada di kantor parusahaan mahadangi bos. Kabalujurun bosnya ne urangnya baikan banar, asalkan jangan salah pander. Kada lawas datang bosnya. “Maap Pak, ulun kabalujuran banyak banar kaparluan duit bulan ini, jadi ulun minta dinaikkan gajih, ulun juwa sudah 8 tahun bagawi di sini!” Jar Wanbuy mawanikan hampadal.

“Siapa nagaran ikam, kena aku cek dulu prestasi gawian ikam?” Jar bos ne te.

“Iwan Boy, Pak. Saya bagian mandor pupuk!” Jar Wanbuy.

“Apa!!!!!” Jar bos ne te. “Naik gajih? Kada salah kah? Ikam kadada bagawi apa-apa tahun ne. Cuba ikam hitung, satahun 365 hari. Jam bagawi 8 jam sahari, baarti sepertiga hari, jadi dalam satahunan ada 122 hari bagawi,” badiam satumat bos ne te.

“Kantor tutup bila hari Ahad, jadi bakurang 52 hari satahun, tinggal 70 hari. Ikam sumalam maambil cuti dua minggu, jadi bakurang pulang 14 hari, tatinggal 56 hari. Paling sadikit 4 hari libur dalam satahunan, jadi tatinggal 52 hari juwa,” bahinak satumat bos ne te lalu manarusakan.

“Di kantor ne Sabtu libur juwa. Nah, ada 52 hari Sabtu satahunan. Jadi satahunan ne, ikam kadada bagawi lalu. Kanapa maka ikam minta naikakan gajih?”

Langsung mangalunyur Wanbuy ne asa supan wan bos.

Iklan

4 thoughts on “WANBUY HANDAK MINTA NAIK GAJIH

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s