TAJAJAK KODOK (Serial Utuh Ujai)


TAJAJAK KODOK (Serial Utuh Ujai)
Oleh: Adum M. Sahriadi

Hari itu rame banar di SMA Sambang Lihum. Bubuhannya lagi riuh bapanderan handak naik ka gunung, maklum hanyar baisi grup Sipala (Siswa Pacinta Alam) nang dikatuai Utuh Ujai. “Ulun mausul, kita umpat buhannya di acara Ekspedesi Meratus bulan Agustus kena!” Jar Utuh Ujai. Ahirnya sunyaan satuju, tapi sabalum umpat acara itu, buhannya bapakat handak naik badahulu, supaya tahu wan medan nang handak dilalui, maklum mambawa kawan banyak waktu acara kena. Singkat kisah, tapilih baampat nang disuruh naik badahulu ka gunung. Nang baampat ne, Utuh Ujai anaknya Utuh Hirman, Adum Halus anaknya Pambakal, Utuh Usai anaknya Su Ijak, wan Wanbuy anaknya Julak Pirhan.

Isuk arinya barangkat nang baampat ne, sampai di Loksado buhannya bajalan batis manuju ka atas gunung. Di tangah jalan, ari hujan daras wan papatirnya. Tapaksa buhannya bataduh di pupundukan nang kada tapakai lagi. Imbah buhannya bataduh di situ, kada lawas datang urang nang turun matan atas gunung bataduh di situ juwa. Urangnya tuha nang kaya dukun haja pakaian. Matan kapala sampai ka batis, hirang haja nang ada. Kangkalung taring babi, sisingut panjang bagarak-garak, saparu kapala bahuban, wan janggut panjang baayam nang kaya karis naga runting.

Hinip buhannya barataan. Balalu Utuh Ujai batakun, “Pian matan mana dangsanak?”

Lalu urang ne te manyahut, “Diaku matan atas manjanguk dangsanak nang lagi kasukaran,” jar sidin. “Sumalam aku dihabari burung bahwa damang maninggal dunia, bangaran dangsanak tapaksa naik ka atas.”

“Pian di mana bagana, gawian pian nangapa?” Jar Adum Halus umpat batakun.

“Diaku ne pananamba urang garing, baik garing karna panyakit alam atawa gara-gara diganggu urang halus. Aku bagana di Samarinda,” jar sidin.

Unggut-unggut buhannya nang baampat ne mandangari panderan sidin. “Manurut diaku, buhan ikam handak ka atas, iya luku? Nah mun buhan ikam ka atas, hati-hati ada tajajak kodok. Kena mun tajajak kodok, buhan ikam pacangan dapat pacar nang kada bungas!” Jar sidin, imbah itu langsung hilang mahalimun. Tanganga buhannya malihat kajadian nang kada masuk diakal nintu.

Ari ampih hujan, buhannya malanjutakan bajalan ka atas. Kada lawas, “Awwwwwww, nah hikamam, aku tajajak kodok,” jar Utuh Usai. Tapaksa nang lain bahati-hati bajalan, kada lawas si Adum Halus tadingsir gugur ka lilibakan, kada sangaja si Wanbuy tajajak kodok juwa imbah handak manulungi Adum Halus nang tagugur. “Nah, iyapang, tajajak juwa aku!” Jar Wanbuy.

Tinggal Adum Halus wan Utuh Ujai ja lagi nang balum tajajak. Sakalinya imbah sampai di puhun ganal, saalaman kodok haja isinya, maklum imbah hujan labat. Tapaksa Adum Halus wan Utuh Ujai bagagamat bajalan. Imbah Adum Halus maangkat batis, pas handak malabuh, maluncat kodok ka bawah batis, takajut Adum Halus, tapaksa beambung ke higa, pas tajajak langsung ampat ikung mati. “Nah, kada kawa bauling lagi Jai ae aku, ne sakali ampat mati,” jar Adum Halus.

Tinggal Utuh Ujai nang balum, tapaksa inya mambawa kayu sagan mausir kodok di hadapan supaya kada tajajak. Imbah sampai di atas, wan imbah itu turunan pulang ka Kandangan, Utuh Ujai tatap kadada tajajak kodok. Himung wan arai Utuh Ujai ne kada katulungan.

Singkat kisah, imbah banaikan kalas di SMA Sambang Lihum, buhannya ne masing-masing dapat pacar. Bujur juwa ae nang disambat dukun dahulu waktu buhannya naik ka atas Loksado, “Siapa nang kada tajajak kodok, maka inya cadangan baisi pacaran bungas.” Kabatulan alias tamintang di SMA Sambang Lihum, bibinian nang paling bungas tu si Enor anaknya Utuh Runi. Jadian ae Utuh Ujai ne wan si Enor. Padahal mun dilihat muha, bungas juwa buhannya nang batiga tadi daripada Utuh Ujai. Tapi bangaran nasip wan ramalan urang anih sumalam kabalujuran bujur.

Lalu takisah si Enor nang lagi bapandiran wan kakawanannya si Irah, Siti, wan Jahrah. “Napa Nur maka ikam hakunnya bapacaran wan Utuh Ujai?” Jar Irah.

“He eh, bungas kada juwa, gagah kada juwa!” Jar Siti.

“Jaka ikam wan Adum Halus ha!” Jar Jahrah pulang.

“Kaini kisahnya buhannya ae, sumalam waktu kita umpat acara Ekspedisi Meratus, aku tatamu wan urang tuha nang anih, lalu sidin bapasan, hati-hati di jalan, mun sampai ikam tajajak kodok, cagaran dapat pacar nang kada bungas jar sidin, imbah baucap kaitu langsung hilang sidinnya!” Jar Enor mangisahkan.

“Uhhhhhhh!!!!!!!!!” Jar buhannya unggut-unggut.

Iklan

2 thoughts on “TAJAJAK KODOK (Serial Utuh Ujai)

  1. Nah pas am,,,kawanku untng haja tajajak katak kada tajajak kuduk. Pantas ae inya bisian bini kaya luna maya,,ta mirip2 pang jua kya cut Tari. Hahahayyy…..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s