Utuh Ujai Umpat Lumba Pidatu (Serial Utuh Ujai)


Utuh Ujai Umpat Lumba Pidatu (Serial Utuh Ujai)
Oleh: Pambakal Jingah Rabit

Mahadapi bulan Muharam, sakulahan Utuh Ujai SMA Sambang Lihum maadakan Fistipal Muharram. Banyak lumba nang ditandingakan di situ. Ada lumba habsi, ada lumba baturai pantun, ada lumba bapidatu, baharatan kalas wan banyak ae lagi nang lain. Nah, kabatulan di kalas imbah musawarah lalu diputusakan Utuh Ujai umpat lumba pidatu. Bangaran pamintarnya di kalas, tapaksa ae Utuh ne mahakuni. Bulik ka rumah, Utuh batakun wan abahnya Utuh Hirman, “Bah, siapa di kampung kita ne nang harat bapidatu?”

“Satahuku, Angah Biju nang paling harat. Bahari suah juara pidatu sampai ka kacamatan. Suah juwa jadi pambawa acara waktu Kai Hartu jadi parisidin bahari datang ka kampung kita,” jar Utuh Hirman.

Singkat kisah, utuh ne balajar bapidatu wan Angah Biju. Angah Biju ne dasar kalihatan urang pintar, bakacamata, wan gonal awaknya. Samingguan utuh ne ka rumah Angah Biju, balajar nintu haja. Imbah bulik ka rumah surang, kuriak-kuriak di hadapan caramin ganal dalam kamar Utuh Hirman. Kadada nang lain lagi digawi, pukuknya makan guring sakulah wan kuriak-kuriak haja gawiannya. Di mana tatamu caramin, di situ inya latihan. Sampai-sampai kuriak-kuriak di hadapan rumah pambakal, padahal pambakal malihat haja matan dalam rumah. Bingung pambakal, pina saikung pulang nang malali di kampung ne, tapi imbah dikisahkan urang pada handak umpat lumba, unggut-unggut ae pambakal.

Sampai hari nang ditantuakan, imbah panitia mangiyau, tampil ae Utuh Ujai di atas panggung. Hinip sunyaan panuntun mahadang. Imbah badiam satumat sambil mamandangi diwan juri wan panuntun, lalu utuh mamulai.

Assalamualaikum Wr Wb.
Nang ulun hurmati diwan juri, kapala sakulah, paguruan, wan kakawanan barataan. Eh, tatinggal, juwa pambakal la’an (Imbah malihat pambakal masuk ka ruangan. Langsung baunggut pambakal imbah disambat ngaran tadi).

Hadirin, hadirat, wan kakawanan barataan. Hari ulun handak bapandir sarius, kita dangari wan pikirakan wan utak kita nang sahimpil ne mudahan sadar sunyaan.

Nang lucu ulun lihat dalam kahidupan kita di kampung Jingah Rabit ne:
Duit 20 ribu, asa ganal banar mun kita sumbangakan wan sadakahkah ka masigit, tapi sadikit banar mun dibawa ka pasar.

Imbah tu, waktu nang 45 manit, satumat banar mun kita malihat Barcelona wan MU main bal, tapi asa lawas banar mun 45 manit dibawa bajikir.

Juwa, waktu 2 jam tu asa lawas banar mun kita badiam di masjid, tapi capat banar 2 jam tu mun kita duduk di warung acil Enor atawa nuntun pilim di biuskup wan pacar.

Kaitu juwa, ngalih banar kita baucap marangkai kata rahatan bado’a, tapi nyaman banar bapandiran mangusip urang, atawa mamandirakan Su Ijak nang malam tadi kana buntut.

Nang lucu juwa, kayapa raminya kita mun parpanjangan waktu main bal, tapi imbah mandangar imam mambaca ayat nang tapanjang rahatan sumbahyang tarawih, asa lapah banar.

Salain nintu, nang lucu juwa waktu kita mambaca Qur’an sahalaman asa lapah banar manuntungakan, tapi mun mambaca novel kandal nangkaya Laskar Pelangi, The Davinci Code, atawa Angels and Demons, tuntung haja saminggu.

Nang lucu lagi, kita barabutan nuntun main bal atawa nuntun kunser ST12 di paling muka, tapi imbah sumbahyang Jumahat barabut nang paling balakang supaya capat kaluar atawa mahurupi sandal urang.

Asa lucu juwa, kita karap parcaya banar napa nang disambat di kuran, tapi kada suah batakun napa nang disambat Qur’an.

Nang pambanyaknya di kampung kita, banyak nang bapikiran handak masuk surga tapi kada hakun taat wan agama.

Nang anumnya wahini katuju maupdit status pisbuk kada mangaruan, tapi imbah maupdit status nang parkara kabaikan atawa ibadah wan pangatahuan bapikir dua kali.

Nang tarakhir wan paling lucu, (badiam satumat Utuh Ujai ne mamandangi nang hadir batitikan banyu mata, Guru Apur sampai kadawani bagarak takutan kalu guguran banyu mata), nang lucu bila kita mandangar caramah, papadahan urang kita sadih wan sadar, tapi imbah bulik ka rumah tatap haja nang kaya asal mancuntan, minum gajah, atawa mamutik rambutan pambakal. (Takajut barataan imbah mandangar sasambatan Utuh Ujai nang paampihan, apalagi nang tatangis tadi).

Damikian pidatu matan ulun, nang hilapnya dasar kasalahan ulun surang muhun dimaapi, nang bujurnya nintu samata-mata matan Allah SWT.

Assalamualaikum Wr Wb.

(Ahirnya Utuh Ujai manangg lumba pidatu, napa nang lain nyarah kada wani malawan).

Barilaan.

Iklan

4 thoughts on “Utuh Ujai Umpat Lumba Pidatu (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s