JADI TUKANG GUNTING (Serial Utuh Ujai)


JADI TUKANG GUNTING (Serial Utuh Ujai)
Oleh: Pambakal Jingah Rabit

Naya kisah Utuh Ujai nang sakulah di SMA Sambang Lihum. Utuh Ujai umpat istrakulirkulir, balajar manjadi tukang gunting rambut. Bangaran urangnya capat pamahaman, jadi tukang lajari kada kauyuhan malajari Utuh. Ampat kali partamuan haja sudah lihay utuh ne manggunting rambut. Sampai guru-guru nang lakiannya, sunyaan manyurung kapala. Pukuknya handak gaya apa haja, asal bapadah haja. Mulai rambut nang kaya turihan puhun gatah nang kaya Ahmad Dani sampai nang kaya kotak amal ampun Tukul Arwana, sutil banar inya manggawi. Imbah malihat kaharatan Utuh Ujai ne, lalu sakulah mausulkan supaya diulahakan salon pakai bagunting rambut lakian di muka sakulahan, salajur manyalajur sagan tambahan pandapatan wan wadah praktik bubuhannya nang handak balajar.

Imbah tuntung salonnya diulah, nang panambayan datang adalah patuan guru nang babacaan di masjid Utuh Ujai. “Handak gaya napa guntingannya?” Jar Utuh Ujai. “Nang biasa haja,” jar patuan guru. Imbah tuntung mangguntingakan, lalu patuan guru ne betakun, “Barapa diaku bayar, Tuh?” Jadi jar Utuh, “Kada usah patuan ae, ulun mangguntingakan pian haja sudah sukur.” Imbah patuan guru bulik ka rumah, isuk harinya datang 12 buting buku agama nang dikirimakan patuan sagan sakulahan Utuh Ujai.

Nang kadua datang pulisi Madi, “Guntingakan nang gaya gundul sakulilingan haja!” Imbah tuntung mangguntingakan, lalu pulisi Madi betakun, “Barapa aku bayar, Tuh?” Jadi jar Utuh, “Kada usah pulisi ae, ulun sanang bangat mangguntingakan urang nang hakun jadi tukang gaduhi masarakat.” Imbah pulisi Madi bulik ka rumah, isuk harinya datang 12 buting wadai donat nang dikirimakan pulisi Madi gasan Utuh Ujai wan kakawanannya.

Nang katalu datang bagunting, yalah Pambakal Jingah Rabit. “Guntingakan aku nang kaya Ahmad Dani!” Jar pambakal. Imbah mangguntingakan, lalu pambakal ne betakun, “Barapa diaku bayar, Tuh?” Jadi jar Utuh, “Kada usah pambakal ae, ulun sanang bangat mangguntingakan pian nang hakun maurusi kampung kita.” Imbah pambakal bulik ka rumah, isuk harinya datang 12 ikung Bubuhan Jingah Rabit nang manyurung kapala minta guntingakan juwa, maka macam-macam gaya. “Nah am, ngini maka am tasalah sumalam aku manggaratisakan, tapaksa kutarimai duit buhannya ne. Mun kada, bisa sakampungan datang, lanik tanganku,” jar Utuh Ujai dalam hati.

Imbah bulikan bagunting, bahamuk-hamuk buhannya di warung, napang rapai 10.000 saurang. “Kana am kita, akali pambakal kita ne,” jar Su Runi. “Ujar gratis tadi,” jar Su Ijak juwa. Kalakakan buhannya di warung tatawaan, manawakan nang kana akali pambakal.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s