HANDAK KAWIN PULANG (Serial Utuh Ujai)


HANDAK KAWIN PULANG (Serial Utuh Ujai)
Oleh: Adum M. Sahriadi, Kelua

Sama wan kisah-kisah nang tadahulu, kisah naya kada mangisahakan Utuh Ujainya, cuma mangisahakan Su Runi abahnya si Enor. Kaina kaitannya si Enor ne kawin wan Utuh Ujai anaknya Utuh Hirman, tapi lawas pang lagi kesahnya. Kisah ne masih jaman pandikar bahari.

Hari itu Su Runi taungut saurangan, satumat-satumat ka kuburan bininya, satumat-satumat ka batang banyu mancibuk banyu hagan dibawa ka kubur. Imbah bininya si Aluh Miang maninggal bakas kaguguran galapung, kada sakilo pang galapungnya, tapi sa-trak, karna waktu itu trak nang maangkut galapung tabalik manindihi Aluh Miang. Imbah kajadian tu Su Runi ne panglihatan urang kampung pina ubah banar, kada pamandir lagi wan hari-hari ka kubur bininya haja. Talu kali sahari inya datang ka kubur bininya manyiram kuburan bini nang paling inya sayangi.

Balalu bubuhannya takumpulan di warung Pambakal Jingah Rabit, ada Utuh Hirman, Su Ijak, Julak Pirhan, wan nang lainnya. Rame buhannya mamandirakan kalakuan Su Runi nang pina malalain. “Cuba pang Tuh, kam pandiri Su Runi kasiannya tiap hari kaitu!” Jar pambakal mamadahi ka Utuh Hirman.

“He eh, kasian inya, kalu babulik ka asal kaya halam tu, diandak urang ka Sambang Lihum pulang,” jar Su Ijak manambahi.

“Kada sanggup pambakal ae. Kaluku urangnya malali imbah kupandiri. Tahu saurang kalu, inya tu baisi jurus bangkui maratus, sakali sipak, sapuluh ikung urang langsung bagalar almarhum,” jar Utuh Hirman. “Pian ja, satahu ulun, pian ja nang kawa malawani inya!”

“Aku kasian, talu hari sakali inya ka kubur bininya, subuh, siang, wan kamarian. Gawiannya kada lain, maambil banyu, imbah itu disiram ka kubur tu, maka sudah saminggu nang kaitu haja gawian,” jar Julak Pirhan sambil malikit ruku.

“Bah lih, ayuha mun kaitu, kaina mun inya lalu, kiyau aku! Aku handak basalin baju dahulu ka dalam,” jar pambakal. Masuk pambakal ka dalam kamar, mamasang baju kijang putih. Lalu mamasang kupiah singgang ka kiwa. Maaabil tapih, lalu diulahakan salindang. Nang paampihan, sidin manjumput camati di bawah ranjang. Imbahtu sidin sumbahyang dua rakaat, lalu baamin. Kada lawas, sidin manyalakan api, lalu mandadang batis sidin sambil mambacaakan mantra, “Pur sinupur, siapa maawur, tahambur”, lalu dipusutakan sidin ka batis.

Di luar, napa kah Su Runi ne singgah ka warung pambakal. Buhannya hinip, kada sing suaraan. “Mana pambakalnya?”

“Di dalam, lagi badadang,” jar Su Ijak.

“Jah, pambakal handak bakalahikah, lawan siapa?” Jar Su Runi.

Hinip buhannya. Kada lawas kaluar pambakal. Malihat Su Runi ada di warung, langsung muntung sidin kakarimut babacaan.

“Jah Kal, pina mamakai baju kabasaran. Pian tapahual lawan siapa, nyaman aku manggani’i?” Jar Su Runi pina takajut.

“Kadada tapahual sanak ae,” jar pambakal. Lalu pambakal baparak ka Su Runi, buhannya bagisir sambil basiap-siap maluncat. “Kaini Run ae, ikam tu sayang banarkah wan arwah binimu tu, maka tiap 3 kali sahari ikam manyiram kuburannya. Jadi sabujurnya, aku badadang ne, handak manakuni ikam parkara itu.”

“Astagfirullah,” tadikir Su Runi. “Ha ha ha, kada sampai kaitu pang Kal ae. Ulun mangira haja, mun bubuhan di kampung Jingah Rabit ne manyambat ulun tabulik kaya dahulu lagi. Kaini kisahnya, sabalum bini ulun maninggal inya sampat baucap: mun aku kaina kadada lagi, pas ikam handak kawin pulang, tunggui sampai kumpai di kuburanku tumbuhan pulang. Nah makanya aku tiap hari manyirami supaya capat tumbuh kumpainya. Ne, jadi aku ka sini, aku handak batakun, pian ada lah bajual pupuk uria?”

“Astagfirullah,” jar buhannya badarau bajikir.

Iklan

7 thoughts on “HANDAK KAWIN PULANG (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s