KUPI HIRANG (Serial Utuh Ujai)


KUPI HIRANG (Serial Utuh Ujai)
Oleh: Adum M. Sahriadi

Naya lain kisah Utuh Ujai pang, tapi ada haja kaitannya kena. Sababnya kisah naya mangisahakan WanBuy kawan Utuh Hirman abahnya Utuh Ujai. Iya kalu, ada juwa ae kaitannya wan Utuh Ujai.

WanBuy ne sabujurnya tantara angkatan darat. Pangalamannya banyak banar, urangnya taguh, wan awaknya dasar babigi-bigi saking kakarnya. Baisi bini, bungas banar urangnya. Jadi saimbang haja, lakiannya gagah, binianya bungas. Karancakan, biniannya bungas, lakiannya kada, tapi lakiannya baisi jimat japang, sibi’ir atawa Ninja, bisa juwa tu. Bisa juwa, lakiannya gagah, biniannya tuha wan balu, tapi sugih bangat.

Hari itu Wanbuy tulak ka duktur Adum kawannya juwa.

“Tulungi pang sanak!” Jar Wanbuy mamulai pander.

“Napa habar, tatimbak tiruris pulangkah situ?” Jar duktur Adum.

“Kada, kaeni sanak ae. Minggu dahulu waktu diaku bulik bagawi, biniku si Irus katangkapan salingkuh wan urang. Capat kucabut pistol lalu kutating ka biniku. Tapi lakian salingkuhan biniku baucap, ‘Parcuma ikam mambunuh bini ikam, nang nyata ikam masuk panjara, wan ikam kada kawa basama bini ikam lagi. Baik kita nginum kupi ha.’ Ahirnya lamah diaku, lalu inya maulah kupi ka dapur, imbah tu kami minuman.”

“Akayah ae, imbah tu pang?” Jar duktur Adum pulang.

“Nah, imbah isuknya, katamuan pulang inya salingkuh wan nang itu-itu juwa. Lalu kutating pistol ka arah lakiannya. Tapi sakalinya, kawa pulang inya malamahi, jarnya mun inya mati, bininya pacangan salingkuh pulang lawan nang lain. Imbah tu inya maulah kupi, lalu kami minuman pulang.”

“Jah, jadi pang napa masalahnya?” Jar duktur Adum.

“Nah naya, tadi, kada balanggar Ahad, katamuan pulang inya salingkuh wan lakian nang sumalam. Balalu kuandak pistol ka muntungku saurang. Sakalinya lakian tadi malamahi pulang wan ucapan, ‘mun ikam mati palagi ae mambari paluang wan kami baduduaan tarus, bisa-bisa takawin kami.’ Ahirnya lamah pulang diaku, imbah inya maulahakan kupi.”

“Akayah ae, jadi kahandak ikam napanya?” Jar duktur Adum, “mulai tadi bakisah haja.”

“Ini masalahnya sanak ae, diaku ne handak batakun, kupi hirang tu baik kah gasan kasihatan?”

Iklan

2 thoughts on “KUPI HIRANG (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s