ISRA MIKRAT (Serial Utuh Ujai)


ISRA MIKRAT (Serial Utuh Ujai)
Oleh: Adum M. Sahriadi

Imbah kajadian Aluh Karamunting batamuan lawan jin iwak sumalam, hari ini Utuh Hirman abahnya Utuh Ujai datang ka rumah Aluh. Himung Aluh malihat Utuh ne, lalakian nang jadi idaman hatinya. Imbah Aluh mambukai lawang, dunia ne karasaan kaya badiam satumat. Ari rasa ampih baangin, laut asa ampih bagalumbang. Burung di langit nang kaya tadiam wara, kaya gambar. Jam di rumah tu ampih baputar. Jantung buhannya badua ne asa ampih badanyut, tapi kada lawas tabulik kaya asal imbah Utuh ne manakuni habar.

“Baik banar Tuh ae. Napa hajat pian pina datang ka sia wan Pambakal Jingah Rabit?” Jar Aluh manakuni.

“Nah, mun nintu ulun langsung sarahakan wan pambakal haja!” Jar Utuh Hirman.

“Ahm..ahm. Kaini luh ae, kami ka sia handak batakun, ikam wahini adalah cadangan beisi kawan?” Jar pambakal.

Kasadakan Aluh ne. “Nah, kada paham ulun pambakal ae. Kawan nangapa? Ulun ne bajualan baju di pasar mulai hari ne. Nyata ae banyak beisi kawan,” jar Aluh pupura kada paham.

“Kada, maksud ulun, pian adalah beisi kawan guring?” Jar pambakal mabujurakan pandir.

Bauling-uling kapala Aluh. “Jadi pang, napa maksud ne?”

“Kaini Luh ae, Utuh ne malam tadi bajalan ka rumahku malam tadi. Lalu inya bapadah pada handak bekawan lawan ikam, maksudnya bahalalan wan ikam. Kayapa Luh?”

Tadiam pulang dunia, jangkrik nang rahatan tadi riuh, sunyi sunyaan. Lalak nang tadi pina baratip ngajian, ranai kada sing suaraan. Kada lawas, ka dalam Aluh ne kada sing pandiran. Imbah tu kaluar mambawa dua cangkir banyu.

“Kayapa Luh?” Jar pambakal maanyaki.

“Paham ja kalu, jaka ulun kada hakun kada ulun surungi banyu tu pang pian?” Jar Aluh supan-supan.

Takurihing pambakal. Utuh Hirman nang mulai tadi pucat, langsung lihum. Kalihatan naik sari muhanya. “Mun kaitu masalah jujuran kayapa?” Jar pambakal.

“Ulun kada minta nangapa apa-apa, nang wajibnya haja.”

Singkat kisah singkat tali salawar, kawin ae buhannya. Bangaran sama pada balu, kawinnya gin malam. Rami urang maantar Utuh, nang kaya pawai tanglong bulan puasaan, sunyaan mambawa lampu culuk. Singkat kisah pulang, malam partama. Singkat kisah pulang, sudah sabulan buhannya kawinan.

Hari itu pas bulan Rajab, urang rami bamikratan. Hari itu pas giliran di masigit Utuh. Pancaramahnya mangisahakan parjalanan Nabi mulai rumah ka Palistina wan ka langit. Imbah tuntung acaranya, bulikan urang sunyaan ka rumah masing-masing. Malam nintu imbah naik ka rumah, langsung Utuh ne guring ka kalambu. Di dalam kalambu si Aluh sudah lawas taguring.

Kada lawas guring tamimpi Utuh ne. Mungkin karana tabawa-bawa kisah pancaramah tadi, inya marasa dibawa ulih urang bungas ka langit. Imbah sampai ka langit partama, inya batamuan lawan padang nang luas. Imbah tu dibawa pulang ka langit ka dua. Sampai ahirnya inya sampai di langit nang katalu. Di sia inya bingung malihat, sajauh mata malihat lampu sumbu haja isinya. Ada nang nyarak, ada nang kurup. Lalu batakun ae Utuh wan urang nang mambawa tadi. “Ne tampat apa ngarannya?”

“Ini tampat umur manusia, mun lampunya nyarak baarti panjang masih umur, bila lampunya kurup baarti parak mati,” jar urang bungas nang mambawa tadi.

Lalu Utuh mancari’i lampunya saurang. Satiap lampu batuliskan ngaran masing-masing. Imbah tatamu lampu nang batulis ngarannya saurang Utuh Hirman bin Utuh Landaw bin Utuh Karak bin Salman bin Albert Instin bin Jengis Khan bin Napoleon bin Aristotoles bin Datu Adam. Utuh malihat lampunya kurup. “Nah napa pina kurup lampuku?”

“Bearti umur ikam parak tu sudah,” jar urang tadi.

Bapikir Utuh ne kayapa supaya lampunya banyarak. Dilihatinya lampu tadi, sakalinya sumbunya handap tamasuk ka dalam. Lalu ditari Utuh bagamat lampunya, tatap kada mau nyarak. Lalu ditariknya bagancang. TAPAUUUUU…… BRAAKKKKKKKK. “Au, akayah ae!” Utuh gugur matan ranjang.

Bininya langsung bangun imbah manampar Utuh. Sakalinya sumbu lampu tadi, puting ampun bininya nang ditarik Utuh bagancang.

Note:
Lampu culuk : lampu nang diulah matan puhun paring nang dibuati minyak gas disumbui lawan kain (BB Hulu)
Di sia: di sini (BB Hulu)
Kalo (K) Luku (H)

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s