Sapuluh Kali Lipat


SAPULUH KALI LIPAT (Serial Utuh Ujai)
Oleh: Pambakal Jingah Rabit

Aluh Karamunting bakalahi wan nang laki si Sarawin. Sababnya si Sarawin kada bulik-bulik nang kaya kisah di lagu ‘Bang Toyip’, talu kali hari raya puasa. Si Sarawin ne umpat urang madam ka Sumatra. Sakalinya datang habar ka Aluh pada lakinya si Sarawin babini pulang di sana. “Iya pang nasibku ne, mana kada suah dikirimi, babini ha pulang di sana. Mun kaitu, baik aku bacari laki ha juwa di sini,” jar Aluh Karamunting dalam hati. Kabatulan di kampung Jingah Rabit ada nang bangaran Utuh Hirman abahnya Utuh Ujai nang lawas juwa balu urangnya. Jadi Aluh ne nang kaya mandambakan bangat handak malaki’i si Utuh Hirman.

Subuh nintu Aluh ne tulak ka sungai handak batatapas. Imbah bamula batatapas, sakalinya si Aluh ne malihat iwak nang kalapak-kalapak takapit di batu. Baparak ae Aluh ne handak manangkap, lumayan kada manukar iwak, sakalinya nang anih banar iwaknya bapander, “Mun ikam manulung diaku, maka aku hakun mangabulakan 4 kahandakan ikam. Tapi, napa haja nang ikam handaki maka lakimu akan mandapatakan 10 kali lipat kahandakan ikam.”

Kada panjang pikir, langsung si Aluh manulungi iwak ne. Lalu nang panambayan inya maminta supaya dibungasakan. “Ingat, laki ikam cadangan babungas juwa 10 kali lipat,” jar iwak ajaib ne maingatakan. “Kadapa,” jar Aluh. Bimsalabim, hatap dua bidang, langsung jadi kahandakan Aluh ne. Langsung bungas urangnya, lamak mungkal, maulah urang nang maningau baliuran.

Kahandakan nang kadua, si Aluh ne batagih supaya sugih. “Ingat, laki ikam cadangan sugih juwa 10 kali lipat,” jar iwak ajaib ne maingatakan. “Kadapa,” jar Aluh. Bimsalabim, hatap dua bidang, langsung jadi kahandakan Aluh ne. Hibak galang amas wan kankalung barlian barundun di puhun gulu.

Kahandakan nang katalu, si Aluh batagih supaya Utuh Hirman hakun balaki lawan inya. “Ingat, laki ikam cadangan babini juwa 10 ikung,” jar iwak ajaib ne maingatakan. “Kadapa,” jar Aluh. Bimsalabim, hatap dua bidang, “Mun ikam bulik kaina, cadangan kada lawas, Utuh Hirman langsung badatang.”

Lalu kahandakan nang kaampat, “Aku handak kana sarangan jantung nang paling ringan.” Imbah baucap kaya itu, langsung rabah Aluh ne ka tanah pingsan. Iwak tadi bahilang imbah mangabulakan kahandakan Aluh ne.

Di Sumatra, si Sarawin nang bungas kada katulungan, paling sugih, wan rahatan itu lagi batatay mangawini 10 ikung sakaligus, maribak rabah kana sarangan jantung. Babuihan muntungnya, kada sampat baucap langsung bagalar almarhum.

(Basambung ka serial Utuh Ujai salanjutnya).

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s