KATURUNAN WARIK (Serial Utuh Ujai)


KATURUNAN WARIK (Serial Utuh Ujai)
Oleh: Pambakal Jingah Rabit

Imbah tamat di SD Sambang Lihum, Utuh Ujai anak Utuh Hirman ne malanjutakan ka SMP Sambang Lihum nang kada jauh pada sakulahannya dahulu. Bujur pang macal, tapi salawas sakulah di SD dahulu, Utuh Ujai ne kada suah kada juara satu tarus. Salain nintu, inya harat mangaradaw wan mahalabio pander.

Kisahnya ne, Utuh Ujai umpat balajar biulugi. Karna guru maanggap Utuh ne pintar, lalu disuruh mamimpin diskusi. Diskusinya mambahas asal usul manusia. Imbah dibuka Utuh diskusinya, ahirnya ada dua pandapat. Ada nang mandukung manusia tu asalnya dari warik, ada juwa nang kada sapandapat lawan nintu.

Dua jam dah imbah, kada rumus juwa lagi bahasan. Guru biulugi manyuruh manarusakan, wan buhannya kada kalihatan kauyuhan. Rami banar pukuknya. Ada nang mambahas dari sagi agama, manusia tu asalnya mulai Datu Adam. Ada juwa nang mambahas sasuai tiuri Angah Darwin. Arai banar guru ne malihat kakanakannya pintar-pintar, apalagi imbah malihat Su Adut nang manjalasakan sampai manulis-nulis ka papan tulis cagar mayakinakan. “Mun buhanmu bakaras pada datu kita ne warik, baarti kita ne cucu warik juwa, kada hakun aku,” jar Su Adut mingar.

Kada lawas babunyi luncing istirahat. “Diskusi kita skur sagan samantara, imbah masukan kita sambung pulang,” jar Utuh Ujai nang kaya pimpinan sidang di Dipi’ir. Pukuknya rame tu pang bubuhannya barucau, sampai tabawa ka kantin pamandiran.

Imbah luncing masukan babunyi, langsung takumpulan buhannya di kalas, kada kaya biasanya nang 5 manit imbah luncing babunyi hanyar babuatan ka dalam. Dasar rami banar pang. Kada lawas masuk gurunya. “Kita waktunya sa jam ja lagi, jadi kita gunakan sabaik-baiknya waktu nang tasisa,” jar guru.

Sa jam dah bajalan, masih kada ruus jua masalahnya, masih nangkaya tadi pambahasannya. Pukuknya sakalasan umpat bapandir, bahkan Su Ijap nang pambuntatnya, pamacalnya, wan kada pintar lalu, umpat mambahas. Luncing baganti jam sudah babunyi, buhannya ne sudah talalar jam palajaran Matimatian 15 manit. Limbui paluh Utuh Ujai mamikirakan, kayapa caranya ruus masalahnya. Ahirnya takurihing Utuh Ujai sambil baucap.

“Jadi mun kaini caranya, diskusi diaku ambil alih dahulu. Aku mambagi dua kalumpuk, siapa nang satuju bahwa kita ne katurunan Datu Adam, duduk subalah kananku! Siapa nang satuju bahwa kita ne cucunya warik, duduk subalah kiriku. Aku hitung sampai 10. Satu dua talu ampat lima anam pitu walu sanga jampal!”

Langsung simpun buhannya duduk di subalah kanan Utuh Ujai. Di muhara lawang kalas talihat guru baampikan, kaaraian malihat buhan kalas satu SMP Sambang Lihum badiskusi. “Dasar pintar-pintar kanakan kalas satu ne,” jar guru matimatian.

“Nah, sabagai pamimpin diskusi, ulun ru’usakan masalahnya, jadi sunyaan satuju kalau kita ne dasar katurunan Datu Adam?” Jar Utuh Ujai.

“Satuju…………..!” Jar buhannya badarau.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s