PALAK RUKU


PALAK RUKU (Serial Utuh Ujai)
Oleh: Pambakal Jingah Rabit

Utuh Hirman abahnya Utuh Ujai lagi asik mangarik sisingut di muka caramin. Imbah tu basurui, parsis nang kaya artis Jimmy Lin, lalu ditarik sadikit pakai hujung tangan ka arah dahi. “Sudahkah umamu?” Jar Utuh Hirman manakuni bininya nang lagi manggusuk baju.

“Hadangi, sadikit lagi!” Jar bininya sambil mangipikkan tutungkai ka arah baju nang imbah diculup ka banyu pandan. Harum wan sigar baunya, maklum musim karisis ne, kada tatukar lagi pawangi multu. Jadi banyu pandan pang nang dipilih warga sagan maharumi baju di kampung Jingah Rabit ne.

Hari itu kaluarga Utuh Hirman arai banar, sabab hari itu Utuh Ujai handak parpisahan di sakulahnya SD Sambang Lihum. “Ikam tuh ae, mun lulus wan juara kalas, abah bawa’i manuntun ka biuskup di pasar.” Makinnya ae himung Utuh Ujai nang matan tadi manggusuk sapatu lawan banyu. Padahal sudah satangah jam manggusuk sapatu, wan sudah barasih, masih haja digusuknya, supaya kalihatan kaya urang sugih jar.

Jam 8 pas, buhanya tulakan. Utuh Ujai babuat di balakang sapida unta ampun abahnya. Utuh Hirman manunggang untanya sambil mandadah ka bininya. Rami buhannya tulakan tapaimbai wan Pambakal Jingah Rabit nang maantar anaknya juwa si Adum Halus, wan Su Ijak nang maantar anaknya si Hadran. Sampai di sakulahan tatamu Utuh Runi nang maantar anaknya si Enor.

Acara panambayan sambutan Kapala Sakulah SDN Sambang Lihum, si Amang Kumba. “Bapa-bapa, ibu-ibu, acil-acil, wan siapa haja nang ada di sini, kita bawa tatawa dahulu, imbah ulun hitung, satu dua tiga!”

“Ha ha ha ha ha kik kik kik kik….,” buhannya tatawaan bajamaah, lawas parak 3 manit tatawanya imbahtu ampih bakajut.

“Ehm ehm, kanapa ulun manyuruh tatawa, karna ini acara sambutan pambukaan langsung panutupan. Jadi imbah ulun sambutan ne kada usah disambung lagi acaranya, langsung makanan.”

Riuh panuntun baampikan. “Kada rugi aku maatar anakku,” jar Utuh Runi.

“Kanapa maka kaitu, karna intinya sudah katahuan. Cuba dangarakan baik-baik napa nang kusambat ne, karna aku kada handak maulangi. KAKANAKAN KITA TAHUN INI LULUS BARATAAN. Damikian sambutan saya, mari kita langsung makanan.”

Garupan batis buhannya bukah mancari wadah duduk sagan makan. Pas duduk Utuh Hirman taduduk batatai Pambakal, Utuh Runi, wan Su Ijak. “Ha ha ha, takumpulan bubuhan limbukutnya,” Utuu Hirman mambuka pandir.

“Ha ha ha, kada baubah Kepsek Amang Kumba ne mulai bahari. Kita baampat ne tamasuk murid panambayan di SD ngini,” jar Pambakal Jingah Rabit.

“Nah buhannya, imbah makanan ne, aku handak manaraktir buhanmu manuntun pilim di biuskup pasar, kayapa?” Jar Utuh Hirman.

“Akur,” jar Su Ijak.

“Parkara ditaraktir, kada suah tapalampang wan aku?” Jar Utuh Runi pulang.

Singkat kisah singkat tali salawar, sampai buhannya di biuskup. Dudukan baatur, kursinya kaya tribun, sasain batinggi. Artinya siapa nang duduk di balakang, kada pacang lindung ulih nang di muka. Kakanakan basusun mulai Enor, Adum Halus, Utuh Ujai, wan Hadran. Di balakangnya, Utuh Runi, Pambakal, Utuh Hirman, wan Su Ijak.

Pahadangan balum diputar pilimnya nang bajudul ‘My Name is Khan’ buhannya nang baampat ne malikit ka ruku. Pussss…. Su Ijak maniup palak ruku. Panjang palaknya nang kaya bakas pasawat jet lalu. Pusssss…. Pambakal maniup juwa, langsung bulat-bulat nang kaya donat. Pussssss….. Utuh Hirman maniup, kaluar kaya kotak sagi ampat. Kakanakan nang di bawah baampikan malihat palak nang harat-harat. Pussssss…. Utuh Runi maniup, kaluar nang kaya tadung baliuk-liuk. “He he he,” jar buhannya.

Pusssssssssss…. Kaluar palak ruku matan balakang buhannya talu buting, bantuknya kaya daun kaladi, babantuk amor cinta. Mandam buhannya malihati palaknya sampai habis. Imbah tu tapaimbai mangulih ka balakang. Sakalinya Angah Isam nang taimbai sakulah wan buhannya dahulu. Bibirnya sumbing bagian atas, jadi satiap maniup palak ruku pasti babantuk amor nang kaya daun kaladi. “He he he,” jar Angah Isam mangurihingi buhannya. Mangalakak barataan, sambil tauling-uling.

Barilaan.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s