UMPAT AJAK


UMPAT AJAK
Oleh: Zaki Attamamy, Amuntai

Takisah di pahumaan, tapi banyak jua pang sudah rumah urang. Rumah Amang Kumba ne kada jauh pada SMA Sambang Lihum, kabalujuran amunnya tiap hari Jum’at bubuhan murid-murid nang sakulah di Sambang Lihum ne dibawa kaluar, tapi dipilihi jua pang nang tapintarnya. Ujar urang tu Jum’at barasih, jadi salajur ae gutung ruyung.

Pas tapintang hari itu jadwal mambarasihi gut atawa susungaian di parak rumah Amang Kumba. Nang ngaran masih pamudaan yo, bangun-bangun guring langsung mandi, baaksi-aksi hanyar kaluar rumah pas talihat bubuhannya tadi. Pinandu ae pada ngini bubuhan murid “SL” (suah sakulah di situ jua luku), lalu baparak ae bubuhannya malihati.

Lawas-lawas, kanapakah Amang ne marasa ada saikung nang maitihi tarus wan inya sambil kurihing kujihing. Sakalinya iya jua ae, rupanya kapala mandur kada taitihi ada saikung nang bagamatan kaluar rumbungan. Asa malidup hati Amang Kumba diparaki, pura-pura kada tahu lalu bajalan bajauh Amang Kumba ne mambuang supan. Sakalinya murid nang saikung ne makin balaju bukah mangapung, takajut Amang takibar sumangat. Kada kapikiran bukah naik ka rumah malah ka pahalatan nuju pahumaan tapi tatap ja dikapung diiringi.

Nang ngaran baju nicis yu, kalibut-kalibut bukah di timbuk pahalatan akhirnya tagulimpas jua ae gugur ka pahumaan nang lunau, tapajal dakawa bagarak. “Mati aku, mati akuu..!” Jar Amang pas malihat nang mangapung tadi makin parak. Gugup ladup ladup.

Kaiya annya pas parak, dicatuk nang ngapung tadi. Sambil tatawa inya baucap, “HA HAAA… DAPATT..! Ikam pulang AJAK..!” Lalu bukah mancicing kada maingat…. ###&$$$???!!!…

Tatangis kada babanyu mata manyumpah Amang Kumba sambil bagamatan manggagapi capal nang tapajal di ambul.

Note Red
1.Sambang Lihum (Nang hanyar gabung mungkin balum tahu SL: Wadah pangubatan dangsanak2 nang bausaha pintar, dahulu ngaran RSJ Kayu Tangi Ujung)
2.AJAK (permainan khas Kalsel nangkaya petak umpet, biasanya dimainkan babarapa urang sambil bakapungan, siapa nang dapat, inya nang pulang mangapung urang)
3.Mana ne bubuhan SL nang lain, tu si zaki maulah hual sadikit jar.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s