GURU HASPUR WAN UTUH UJAI (SERIAL UTUH UJAI)


GURU HASPUR WAN UTUH UJAI (SERIAL UTUH UJAI)
Oleh: Pambakal Jingah Rabit

Nangkaya kisah tadahulu, Utuh Ujai anak dari Utuh Hirman ne dasar katuju mahalabio wan dasar pintar juwa urangnya. Tapi nangkaya Julak Abunawas juwa, kapintaran Utuh Ujai ne maulah urang di kampung Jingah Rabit katuju wan inya, alias tatawaan tarus. Sabuting juwa, Utuh Ujai ne kada kawa dipakalah, munnya tapakalah pasti mambalas, palingkada mambari muar urang, tapi urang kada kawa baapa-apa.

Nah, hari itu Guru Apur masuk ka kalas handak mambari palajaran bahitung. Imbah masuk sidin ka kalas, sidin malihat Utuh Ujai ne balukup sambil kurihing-kurihing. Bagamat sidin mamaraki Utuh Ujai, sakalinya Utuh Ujai ne lagi mambaca buku serial ‘Kaminting Pidakan’ edisi nang ka sapuluh nang bajudul ‘Baungkai Hampadal’. Duduk ae guru Apur ne ka kursi sidin, lalu mangajuti Utuh, “Tuh!”

Takajut Utuh imbah dikiyau ngarannya, rupanya mulai tadi Utuh ne kada tahu pada guru Apur sudah masuk. “Napa Pa?” Jar Utuh sambil manyimpuni buku wan manyapui liur imbah kurihing-kurihing saurang.

“Bapa ada tatakunan, mun ada 5 ikung burung di lulungkang, imbah tu ditimbak saikung, barapa lagi nang tatinggal?”

“Habis Pa ae, napa imbah ditimbak nang lain langsung tarbangan baugah wan takajut,” jar Utuh manjawab.

Sambil kurihing-kurihing guru Apur ne, “Salah Tuh ae, sabujurnya nang tatinggal tu 4 ikung. Tapi kada papa, bapa katuju wan jawapan ikam.”

Marasa tapakalah Utuh ne, langsungai mambalas tatakunan. “Pa, ulun handak batakun, mun ada 3 ikung bibinian, masing-masing mamingkuti es potong. Saikung mangucup es sambil mamingkuti bilahnya, saikung manggilati (manjilati) es nya haja, wan saikungnya langsung mangulum es nya. Nang mana di antara batiga tu nang sudah kawin?”

Guru Apur nang hanyar kawin saminggu ne langsungai manjawap, “Ha ha ha, nyata ae nang langsung mangulumnya, iya luku?”

“Ha ha ha, salah pa ae. Nang bujur, nang ada utas di tangannya. Tapi kada papa, ulun katuju wan jawapan pian,” jar Utuh.

Mandarau sakalas kalakakan tatawa.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s