BARABUT KURSI PAMBAKAL


BARABUT KURSI PAMBAKAL

Oleh: Ampeak Sie Kaminting Pidakan, Kelua

Nah, alkisah di kampung Jingah Rabit ne kahidupan masyarakat makmur, damai wan sajahtara. Ini kada lapas lawan pambakal nang mamimpin. Pambakalnya nang bangaran Julak Adum. Sudah 10 tahun orang kada handak mamilih pambakal nang lain. Kada ada nang handak mangganti sidin, karna sidin ini sukses mamimpin kampung.

Nah kisah ini bamaulai iri hati Julak Pirhan lawan Julak Adum. Julak Pirhan ini hndak bangat mangugurkan pambakal. Alasan Julak Pirhan karana mobil ampunnya kada kawa masuk ka muka rumah, karna jalan halus. Jalan babatu, jalannya kada baaspal. Suatu hari ada kunjungan dari bapak camat ka kampung, mamandirkan kaadaan kampung.

“Nah, ini kasampatan unda manyupanakan pambakal,” jar Julak Pirhan dalam hati.

Singkat kisah singkat tali salawar tuntung sambutan pambakal, tuntung pengarahan camat, lalu musyawarah desa. Kada lawas Julak Pirhan maangkat tangan. “Ia, Julak Pirhan, napa habar?” Jar pambakal Adum.

Julak Pirhan bapandir, “Kampung kita ne ulun rasa cocok sudah diaspal jalannya. Sabujurannya dana PNPM adakah gasan pengaspalan desa kita ngini?” Ujar Julak Pirhan.

Lalu pambakal Adum bapandir, “Sabujurannya dana mulai Pemda ulun tujukan dahulu gasan bantuan pertanian, parikanan, wan perdagangan. Masalah jalan kaena haja dulu. Kita bagamatan mambangun kampung.”

Lalu Julak Pirhan baucap, “Nah, saudara saudari, kayapa pambakal kaya ini, padahal nang paling utama jalan dahulu. Mun jalan baik nyaman kita bajual banih, nyaman bajual iwak, nyaman bausaha. Iya kalo?”

“Bujuuuur,” jar urang kampung tapaimbai.

Lalu baucap pulang julak Pirhan, “Sabujurannya dananya ada kada atau pambakalnya nang kada hakun diaspal?”

Lalu Julak Adum pina tadiam, imbahtu badiri manyahut, “Saudara-saudara, ulun pambakal hakun haja diaspal asalakan masyarakatnya hakun disatum, masyarakat hakun ditimbuki, masyarakat hakun disiring.”

Tepuk tangan panonton kada kisah lagi katuju lawan pambakal. “Buhanmu hakun lah disatum?” Jar pambakal.

“Kadaaaa,” jar masyarakat.

“Buhanmu hakun lah di timbuki?”

“Kadaaaa,” ujar masyarakat pulang.

“Buhanmu hakun lah disiring?”

“Kada juaaaaa,” jar masyarakat.

“Nah, mun kaeto sama haja. Pambakal gen kada hakun diaspal!”

Imbah itu Julak pirhan bulik kada sing padahan.

Iklan

2 thoughts on “BARABUT KURSI PAMBAKAL

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s