KAHARATAN UTUH HIRMAN


KAHARATAN UTUH HIRMAN
Oleh: Pambakal Jingah Rabit

Utuh Hirman ne imbah lulus kuliah, handak juwa bagawi nangkaya urang. Balalu inya mancari parusahaan nang sasuai lawan bidangnya, kumputer. Imbah mambaca kuran, inya talihat panarimaan sagan teknisi kumputer di parusahaan batu bara. Umpat ae juwa baulah surat lamaran sagan bagawi.

Imbah meulah, langsung inya antar ka parusahaan. Di parusahaan inya ditarima minijir, jar minijir, “Ikam nang paampihan mandaptar, ijazah ikam sasuai, isuk ikam datangi ka sini hagan tis wawancara!”

Isuk harinya sasuai wan jam nang ditantuakan, datangan buhannya nang handak umpat tis wawancara. Nang ditarima hagan tis naya ampat ikung juwa. Nang lain kada tambus, karna kada sasuai ijajahnya. Imbah tu dikiyaunya bubuhan nang handak tis ne, langsung kaampatnya ditis baimbaian. “Nah, aku sabuting haja tatakunan sagan buhan ikam. Jawaban buhan ikam ne nang manantuakan ditarima atawa kada,” jar minijir. Unggut-unggut buhannya sambil mahadangi tatakunannya.

“Satahu pian, nangapa nang bagarak paling hancap?” Jar minijir manakuni. “Jawab mulai nang subalah kanan duduknya!”

“Alhamdulillah,” jar Utuh, “untung aku duduk paling kiwa, jadi sawat bapikir,” jar Utuh dalam hati.

Palamar I manjawab, “PIKIRAN. Inya mancungul damintu haja di dalam kepala, kadada peringatan, kadada ancang-ancang. Bekajut haja inya kaluarnya. Jadi manurut ulun, pikiran nang baungal paling hancap nang ulun tahu.”

“Jawaban nang bangat bagus,” sahut si menejer. “Mun pian pang?” Minijir manakuni palamar II.

“Hm….KIJIPAN MATA! Datangnya kada kawa ditangguh, wan kita kada sadar mata kita sudah bakijip. Kijipan mata adalah nang baungal paling hancap amun menurut saya.”

“Bagus banar! Wan dasar jua ada ungkapan ‘sakijip mata’ hagan menggambarakan kayapa capatnya sesuatu terjadi”. Si minijir bauling ka palamar III, nang kelihatan bapikir karas.

“NYALA LAMPU adalah nang tacapat nang ulun tahu”, jawabnya, “Ulun rancak menyalakan saklar di dalam rumah wan lampu nang di taman depan langsung wayah mamicik langsung banyala.”

Si minijir terkesan lawan jawaban palamar III. “Dasar ngalih mengalahakan kacapatan cahaya,” pujinya. Himung si minijir, “Cadangan dapat urang pintar ne,” garunum minijir dalam hati. Dikilarnya Utuh Hirman nang panampilan kaya urang propisional. Di gulu bagantung plisdis, kacamata kandal, awak tapaluh. Dibukanya daptar riwayat gawian wan ijajah. “Ahmm…, ikam ne paanumnya, kadada beisi pangalaman balum, mun dilihat lampiran ikam ne, dasar kawa diandalakan pang. Beisi sertifikat kursus bahasa Anggris wan bahasa Japang wan Cina. Cuba pang aku handak tahu, nangapa nang paling hancap?”

“Mulai tadi ulun mamikirakan jawapan buhannya, tapi ulun balain pandapat wan buhannya, jadi jawapan ulun nang paling hancap di dunia ne MENCRET.”

“Nah!!!!” Jar minijir tanganga mandangar jawapan nang pina malalain.

“Jah!!!” Jar buhannya nang lain tapaimbai.

“Kanapa ulun manjawap mencret, dua hari sumalam rahatan malam ulun bakajutan sakit parut. Ulun bukah ka jamban, tapi balum sampai ka jamban, balum sawat BAPIKIR, MANGIJIPAKAN MATA, wan MANYALAKAN LAMPU di jamban, ulun sudah tapucirit di salawar. Nah, jadi ulun wani maambil kasimpulan, mencret nang paling hancap.”

Tauling-uling buhannya mandangar jawapan Utuh Hirman. Imbah diumumakan, sunyaan ditarima bagawi, tapi Utuh Hirman nang jadi mandur bubuhannya nang batalu ne.

(Kisah hagan Ampaek Hermansyah, salamat Ulang Tahun!)

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s