Balajar Matimatika (Serial Utuh Ujai)


Balajar Matimatika (Serial Utuh Ujai)
Oleh: Pambakal Jingah Rabit

Bujur-Bujur Realistik Mang ae!

Salain harat mangaradau, anak Utuh Hirman ne si Utuh Ujai, inya harat jua parkara bahitung-hitung. Kada suah balum timbakan buntutnya malisit, paling kada kana sa bak tu pang. Utuh Ujai ne sakulah di SMA Sambang Lihum kalas satu. Buku catatannya kadada nang lain, hibak wan rumus buntut. Imbah buntut ditutup pamarintah, tatap ja Utuh Ujai ne katuju mautak-atik angka. Sampai guru matimatika di sakulahannya kagum wan kaharatan Utuh Ujai ne. Pukuknya imbah dapat rumus hanyar dari guru, inya kawa pulang meulah rumus nang pina anih wan lucu, tapi hasilnya bujur haja wan masuk akal haja.

Hari itu guru matimatika nang biasa masuk ka kalas Utuh Ujai kada kawa turun, sidin maambil cuti imbah baranak. Jadi sagan samantara, palajaran matimatika tapaksa diisi ulih guru matimatika kalas talu. Imbah sidin masuk lalu bapander ae, “Jar guru matimatika kalas satu, di kalas ne ada nang harat matimatika. Nah, bapa handak tahu, jadi bapa tis dahulu lawan sual.”

Imbah dibagiakan sualnya lima buting, lima manit imbahnya Utuh Ujai langsung mangumpul jawapan. Tanganga guru nang hanyar ne imbah mamariksa, “Rumusnya harat banar, aku haja kada suah balajar,” jar sidin dalam hati. Imbah dicek sidin pakai rumus saurang, tarnyata jawapannya bujur saratus parsin. Uling-uling kapala sidin.

“Utuh Ujai, cuba ikam ulah sual sabuting, imbah itu ikam jalaskan wan kakawanan kayapa caranya manjawap, bapa handak malihat!” Ujar guru tadi imbah maambil jawapan nang dibagiakan panambayan masuk tadi.

Langsung badiri Utuh Ujai ka muka papan tulis, badiam satumat, lalu manulis soal di papan tulis.

Mun umanya wayahne baumur 21 tahun tatuha pada anaknya, 6 tahun imbahnya, umurnya 5 kali lipat umur anaknya.
Sualnya: Di mana abahnya wayahini?

Imbahnya bapaling Utuh Ujai, “Nangini sarius kada bagayaan. Jawapannya ada wan pasti. Samuanya bulih mancuba, tamasuk bapa saurang bulih manjawap.”

Sunyi kalas, bapikir manjawap sual Utuh Ujai tamasuk guru tadi. Saparapat jam sudah, kadada nang wani manjawap. Satangah jam, tatap kadada nang wani manjawap.

“Ikam jawapakan dahulu Tuh ae, nyaman bapa mambanding wan jawapan bapa,” ujar guru ti gaya mahindar.

Utuh Ujai manulis di papan tulis:

M= mamanya
A= anaknya

Wayahne umanya 21 tahun tatuha pada anaknya (A).
M = A + 21

6 tahun imbahnya umur umanya jadi 5 kali lipat umur anaknya.
M + 6 = (A + 6) x 5
A + 21 + 6 = (A + 6) x 5
A + 27 = 5A + 30
27 – 30 = 5A – A
-3 = 4A

A = -3/4

Baarti umur anaknya wayahne (-3/4) tahun atawa (-9) bulan, jadi anaknya balum kaluar pada parut umanya. Sual ulun tadi, di mana abahnya? Jawapannya: WAYAH NE ABAHNYA ADA DI ATAS UMANYA.

“Iya luku, Pa?”

“He eh,” jar guru tadi sambil tauling-uling kapala.

6 thoughts on “Balajar Matimatika (Serial Utuh Ujai)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s