Balajar Pilasapat


BALAJAR PILSAPAT
Oleh: Adum M. Sahriadi

Rahatan kuliah dahulu, Utuh Hirman ne urangnya pintar banar. Pintar maakali, pintar mamintari wan pintar bujuran. Bujur Utuh Hirman ne urangnya pina tawala kalakuan sadikit pada nang lain, tapi inya ne kada suah tatinggal nang ngarannya sumbahyang. Inya bila malam umpat juwa lawan kakawanannya balajar ilmu sifat 20 lawan mualim.

Nah, hari itu inya turun ka kampus, kuliah panambayan mata kuliah pilsapat. Inya handak tahu, jar habar dusinnya pintar banar. Hadang-hadang, ahirnya masuk ae dusin ne tadi. Urangnya pina malalain pakaian, kaus sapatu panjang, salawarnya dimasukakan ka dalam kaus tadi. Kupiah sidin pina tahalang sadikit, nang kaya urang kalah mainan. Kaca mata pina kandal, mata pina ka atas tarus panglihat.

Sunyi kalas nangkaya malaikat lalu. Utuh Hirman mandam malihat muha sidin. “Dasar macam-macam makhluknya di muka dunia ne,” jar Utuh gagarunum dalam hati.

Kada lawas baucap sidin, “Ada nang suah maniring Tuhan?”

Sunyi kalas kada sing suaraan.

“Ada nang suah mandangar Tuhan bapandir?” Jar sidin batakun pulang.

Sunyi pulang, kadada nang wani manjawapi.

“Ada nang suah manjapai Tuhan?” Jar sidin pulang.

Sunyaan bagana, takang rakungan kada sing pandiran.

“Nah, baarti kasimpulannya, Tuhan tu kada ada!” Ujar dusin ne pina takurihing sadikit.

Riuh kalas mandangar ujar sidin tadi. Masing manggarunum lawan kawan di higa, parutis wan pandapat sidin. Kada lawas badiri Utuh Hirman ne.

“Ya, silakan!” Jar dusin mambari kasampatan Utuh ne bepandir.

“Ada nang suah maniring utak dusin?”

Sunyi kalas kada sing suaraan.

“Ada nang suah mandangar utak dusin bapandir?” Jar Utuh batakun pulang.

Sunyi pulang, kadada nang wani manjawapi. Dusin tadi kukurihing ha masih.

“Ada nang suah manjapai utak dusin?” Jar Utuh pulang.

Sunyaan bagana, takang rakungan kada sing pandiran, nangkaya panambayan dusin batakun tadi.

“Nah, baarti kasimpulannya, dusin kita ne kada baisi utak!” Ujar Utuh sambil maangkat tas kaluar pada kalas. “Assalamualaikum, aku bulik badahulu.”

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s