GABIN


GABIN

Oleh: Roni Race Batola

Di sabuah kampung, ada dua urang nang maninggal tapaimbai. Saikung ngarannya Utuh Babab, urangnya buntat banar wan wangal-wangalnya, nang saikungnya tuan guru alim banar. Kaduanya tamintang atawa kabatulan dikuburakan di alkah wan waktu nang sama.

Pas rahatan manabukakan kubur gasan nang badua ngini ngalih banar karna musim banyu dalam, bilang kada bamatian masin panyudut banyu. Imbah tuntung manabukakan lubang, balalu arwah tuan guru ne badahulu dibuat ka luang kubur nang masih hibak wan banyu, padahal masin kada bamatian.

Imbah tuntungan manguburakan tuan guru ne, balalu giliran arwah Utuh Babab nang buntat kada sakira dibuat dipajal ka bawah tanah. Nah, di sini bamula kisahnya nang pina malalain. Sakali arwah utuh ne dibuat ka liang lahat, banyu nang hibak tadi, hilangan. Padahal masin banyu sudah ampih manyadut karna rusak, tatap ja sasain bakaring banyunya.

Samuaan urang kampung kabingungan, asbabnya imbah taingat kalakuan Utuh Kabab sawaktu hidup nang buntat luar biasa. Imbah bulikan dari pakuburan rame buhannya bakisahan wan mamandirakan kaanihan nintu.

“Dasar kada kawa ditangguh manusia tu, siapa tahu tubatnya ditarima waktu paampihan hayatnya,” jar su Ijak pina kalihatan bailmu pandir.

“Mun kaetu, kita cubai takuni ka rumah Utuh, siapa tahu kaluarganya tahu amalan Utuh,” jar Angah Imran mambawai nang lain.

Singkat kisah, sampaian buhannya di rumah Utuh Kabab. “Nah, kami ka sini ne handak batakun wan hampiyan, nangapa amalan Utuh ne sawaktu hidup?” Jar Su Ijak manakuni asbahnya.

“Satahu ulun, kada nangapa-ngapa, cuma sawaktu mulai halus Utuh ne kada bisa makan nasi, sidin makan gabin haja, luku gara-gara gabin nintu jadi banyu di kubur tadi habis karingan,” jar asbahnya.

Wallahul alam?

Iklan

One thought on “GABIN

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s