Kaya Siput Dipais


Kaya Siput Dipais
Oleh: Adum Kelua

Utuh Hirman ne urangnya pandiam banar. Inya mahandaki bibinian idaman hatinya, tamintang urangnya kurang tambah lawan Utuh Hirman pada pandiam juwa. Ngarannya Enor, urang Martapura, bungas langkar wan lamak mungkal. Singkat kisah, bibiniannya mambawai Utuh ne batamuan. Kerna gugup banar, ahirnya Utuh ne batakun lawan Julak Adum nang dasar raja binian juwa urangnya.

“Aku takutan banar luku kena pamandiranku kada tapi lancar, kayapa am, Dum?” Takun Utuh Hirman.

“Kaeni haja Tuh ae, bibinian tu paling katuju mun kita bapander masalah kaluarga, makanan, wan pamandiran nang ada inguh pilsapatnya. Cuba haja, pasti rame tu kaina,” ujar Julak Adum mambari saran.

Ahirnya si Utuh ne hilang takutannya, batambah parcaya diri tu pang. Imbah tu buhannya bajanjian di Bincau batamuan. Sakali tatamu, tapaimbai batakun habar, tadiam badudua. Lawas tadiam nang kaya ada malaikat lalu. Kaganangan Utuh Hirman wan papadahan Julak Adum sumalam, langsungai batakun.

“Ikam adalah beisi kaka?” Jar Utuh Hirman.

“Kadada,” jar Enor.

Tadiaman pulang, ranai garutuk, lawas sunyinya.

Utuh mancubai papadahan Julak Adum nang kadua. “Ikam katuju lah wan masakan Padang?” Jar Utuh mamacah kahaningan.

“Kada,” jar Enor pulang.

Tadiaman pulang, asa mati kutu dah Utuh Hirman ne, lalu kaganangan wan papadahan nang katiga. Balalu Utuh Hirman ne batakun lawan tatakunan nang ada inguh pilsapatnya. “Jaka Ikam beisi kaka, kira-kira inya katujukah wan masakan Padang?”

“Tahu am,” jar Enor manyambungi.

Habis cara dah Utuh Hirman supaya si Enor ne hakun bapandir tabanyak. Tapi jawabannya, ‘kadada’, ‘kada’, ‘tahu am’, haja nang didapat. “Sakali lagi kutakuni, mun nya kaitu haja masih jawabannya, kada jadi aku handak lawan inya,” jar Utuh dalam hati.
“Nor, jaka kaka kam ada, imbah disurungi masakan padang, nyata dah inya katuju. Rihatan makan, pasti inya manyuruh kita ka padang gatah situ, kayapa am pandapat ikam?” Jar Utuh pina camuh tatakunan.

“He eh, hakun ae,” jar Enor sambil manarik tangan si Utuh.

“Wakakakak, kaya siput dipais jua sakalinya,” jar Utuh dalam hati sambil kurihing-kurihing.

Iklan

4 thoughts on “Kaya Siput Dipais

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s