Slang Uksigin


Slang Uksigin
Oleh: Adum Kelua

Pa RT ne tuha banar urangnya wan rancak banar gagaringan awak. Hari nitu sidin dibawa ka rumah sakit diubati. Sampai di rumah sakit, langsung sidin ne dipasangi slang uksigin imbah dilihat sidin pina uyuh bahinak.

Bangaran adat di kampung sidin katuju basilaturrahmi, isuk harinya rami ae bubuhan tatangga wan kulawarga datangan ka rumah sakit. Rami banar nang kaya pasar tungging tu pang di rumah sakit.

Paampihan nang masuk si Utuh. Imbah masuk, langsung si Utuh ne handak basalaman wan Pa RT. Sakalinya bakajutan ubah muha Pa RT, hinak turun naik, muntung maungap handak bapander tapi kada taucap. Takajut, marigap ae Utuh, napa panghabaran ne. Pa RT manunjuk-nunjuk wan jari baisyarat minta ambilkan kartas wan pulpin. Badadas si Utuh manjulungi kartas wan pulpin. Sambil manzikirkan Pa RT di talinga, Utuh ne kada malihat nang ditulis sidin. Imbah tuntung Pa RT manulis langsung manjulung ka Utuh tulisan tadi. Disambut Utuh tulisannya langsung dimasukakan ka dalam kantung. Imbah manjulung nintu, ahirnya sampai juwa umur Pa RT. Urang nang habut diluaran takajut barataan imbah dihabari pada Pa RT sudah wafat.

“Innalillah….,” jar bubuhannya, “untung sawat kita batamuan wan barilaan.”

Karna kajadiannya subuh, jadi kamariannya langsung arwah ne kuburakan. Imbah tuntung ditalaqinkan, takumpulan kulawarga ja lagi di kuburan. Kaingatan Utuh ne wan amanat Pa RT, lalu mancaluk kantung salawar. Sabalum mambuka kartasnya, Utuh mambuka pamanderan.

“Assalamualaikum wr wb.”

“Waalaikum salam wr wb,” jar nang lain manyahuti sambil mandam muha ka arah Utuh kerna kada tabiasa ada sambutan di kuburan, biasanya malam basalamatan haja hanyar ada sambutan dari pihak kulawarga.

“Sabalumnya ulun muhun maap karna mangganggu acara, ulun asa kada nyaman nah, sumalam sabalum arwah maninggal, sidin sawat baamanat atawa bawasiat wan ulun nang ditulis di kartas naya,” jar Utuh sambil manating kartas.

“Inggih,” jar Adul, anak panuhanya Pa RT, “bacaakan Tuh ae!”

Langsungai si Utuh mambuka kartas, lalu mambaca banyaring, kada sadar juwa nang dibaca. Isi amanat sidin, “Tuh, jangan jajak slang uksiginku, aku kada kawa bahinak!”

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s