Manggambar Sapi


Manggambar Sapi
Oleh: Adum, Kalua

Waktu halus, Utuh Hirman ne paling nakal di sakulahan. Sudah nakal, pangoler ha pulang urangnya. Tapi sabuting, Utuh Hirman ne raja akal. Rancak urang tatipu mandangar pamandirannya nang mahalabio tarus.
Hari itu guru Adum kada kawa turun, ada urang banikahan di higa rumah. Lalu sidin manyuruh Guru Pirhan manggantii maajar.

“Aku kada tapi mangarti maajar matimatika,” jar guru Pirhan.

“Kada papa, asal diisikan haja kalas, supaya jangan ribut, tahu ja kalu kalasku tu palainnya pada kalas nang lain,” jar guru Adum.

Ahirnya guru Pirhan mamasuki kalas manggantii guru Adum. Bangaran bingung kayapa maajar kalas satu SD, supaya kada mangalihi, disuruh ae buhannya ne manggambar.

“Assalamualaikum Wr Wb,” jar Guru Adum.

“Waalaikum salam Wr Wb,” jar murid-murid badaraw. Tabangun Utuh Hirman nang mulai tadi taguring gara-gara umpat urang bajatu asam malam tadi.

“Anak-anak, bapa Adum hari ne kada ka masuk ka kalas, sidin manyuruh buhan kam manggambar,” jar guru Pirhan.

“Horeeee…hore….,” jar kakanakan barataan.

“Imbah tuntung, kumpul ka muka,” jar guru Pirhan.

Imbah baucap, sidin langsung kaluar kalas, mamasuki kalas sidin saurang di subalah. Kakanakan rame manggambar. Ada nang manggambar jukung, gambar warik, gambar kambang, wan banyak macamannya. Tapi si Utuh Hirman guring ja, kada tatahu muha. Kadada nang wani manggarak, takutan luku ditampilingnya. Sa jam palajaran, masuk ae pulang guru Pirhan ne.

“Kayapa, tuntung kah sudah?” Jar guru Pirhan batakun.

“Sudah!!!” Jar kakanakan. Lalu samuanya mangumpul ka muka.

Tabangun pulang Utuh Hirman gara-gara kalas gigir. Umpatai mangumpul juwa, tapi kartas kusung haja, kadada gambarnya.

“Jah, Utuh Hirman, ikam kada manggambar kah?” Jar guru Pirhan.

“Sudah,” jar Utuh.

“Ikam manggambar nangapa?” Jar guru Pirhan.

“Ulun mangambar kumpai wan sapi,” jar Utuh Hirman pulang.

“Mana kumpainya?” Jar guru Pirhan.

“Sudah dimakan sapi, pa ae,” jar Utuh.

“Sapinya pang?” Jar guru Pirhan.

“Sapinya bukah imbah pian masuk tadi, takajut inya,” jar Utuh Hirman.

Tauling-uling kapala guru Pirhan malihat kalakuan Utuh Hirman, taganang sidin kayapa uyuhnya guru Adum maajar biasanya. Mudai kalasnya talain pada nang lain jar guru Adum tadi.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s