HANTU GAUL


HANTU GAUL
Oleh: Ampeak Hermansyah, Kalua

Alkisah, di suatu kampung nang bangaran kampung Alai, hidup saorang lalaki nang bangaran Adum. Adum nangini orangnya taat ba ibadah lawan tuhan. Tapi si Adum ngini katuju jua maksiat. (Sambil ma imbangi kalo lech). Semasa Adum hidup handak banar inya marasai narkoba. Kada suah malihat wan marasakan lagi kayapa nikmat narkoba. Adum kaingatan tarus lawan ucapan Julak Tibang, “Ikam Dum ae mun tarasai narkoba, dunia ne ampun ikam sudah,” ujar Julak Tibang pina musti (padahal malihat narkoba gen kada suah).

Singkat kisah singkat tali salawar, si Adum ne penasaran bangat handak tahu lawan narkoba. Sampai Adum meninggal tatap kada suah malihat nang bangaran narkoba. Imbah Adum meninggal kampung Alai bagigiran.

“Si Adum mati penasaran, si adum gentayangan,” ujar urang di wawarungan bapandiran.

“Mun bujur si Adum mati jadi hantu, hadangi ha aku bulik ka rumah malam ne!” Ujar Julak Tibang pina musti manantang.

Singkat kisah saikung, badua, batalo, sampai habis orang bulikan tuju ka hulu, tatinggal Julak Tibang nang tuju ka hilir. Bulik ae Julak Tibang sambil bajalan. Pas di tangah jalan batamu lawan hantunya si Adum. Muha putih mangalas, di mata pina bakas kana burit panci hirang.

“Ooi Tibang,” jar arwah Adum.

“Ini siapa?” Ujar Julak Tibang.

“Aku, Adum!”

“Napa habar neh mailangi aku?” Ujar Julak Tibang kadada takutan lalu.

“Carikan aku narkoba!” Ujar arwah Adum.

“Haaahh, sudah mati masih handak lawan narkoba,” ujar Julak Tibang takajut.

“Bila kada mancarikan, sakampungan urang kuganggui,” ujar arwah Adum pina pusang sudah (balum lagi suah makai sudah sakau).

“Ka mana tuju mancari. Bandanya haja ku kada suah malihat,” pikir Julak Tibang. Lalu Julak Tibang takureheng, “Hadangi di sini aku maambilakan ka rumah!” Ujar Julak Tibang.

Kada lawas datang Julak Tibang mambawa banda nangkaya rambutan ganalnya. Warnanya putih.

“Ne narkobanya,” ujar Julak Tibang.

“Kayapa cara makainya,” ujar hantu Adum batakun.

“Taguk dahulu nah, kina kulajari!” Jar Julak Tibang.

Lalu si Adum managuk banda tadi. “Kayapa manikmatinya?” Ujar hantu Adum pulang.

“Adakah rasa manggalagak di parut sudah?” Ujar Tibang manyahut.

“Eeh..Ada ae, panas parut,” ujar Adum pulang.

“Batungging ikam!” Ujar Julak Tibang manyuruh.

Balalu Adum batungging, si Julak Tibang maambil korek api dalam salawar.

“Siapkah sudah?” Jar Julak Tibang.

“Sudah!” Ujar Adum pina basemangat.

Julak Tibang maningkis korek lalu dicocolakan ka lubang burit hantu Adum. DAGUUMMMMMMMMMMMMMM. Babunyi nyaring, bagantar kampung. Napa si Adum bukah kada tatuju kuburan lagi.

Lalu Julak Tibang baucap sambil tatawa, “Dasar hantu kada baakal, karbit ditaguk, hann… nyamanlah jadi laduman.”

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s