SIRIH HABANG


SIRIH HABANG
Oleh: TumanggungArga Sandipa BatanggaAmas
(Admin Grup FB: BUBUHAN KULAAN URANG ALAI BORNEO)

Sirih Habang (Koleksi Tumbuhan Berkhasiat Pulau Borneo)

Kada disangka sakalinya tie daun sirih macam-macam jua warnanya lieh? Wan ada jua apuahnya hagan ubat. Sabuting di antaranya nintu sirih habang ngarannya, kalunya ngaran latinnya PIPER CROCATUM nang tamasuk sajanis bubuhan PIPERACEAE.

Sirih Habang naya bantuk wan ukurannya sama haja wan sirih nang hijau, lamun nang babida tu tie batang wan daunnya nang bawarna habang kaperak-perakkan wan pina mangkilat. Salain nintu, munnya daunnya dirabit atawa dikunyak-kunyak di tangan, Sirih Habang nintu kaluar landir, wan Sirih Habang naya taharum baunya dari pada sirih hijau.

Sirih Habang ni tie banyak jua macam-macamnya, kalunya di “dunia parsirihan” nang paling harat nintu Sirih Kraton ngarannya, imbah nintu hanyar Sirih Habang Kalimantan. Salain hagan ubat, Sirih Habang naya bagus jua hagan hiasan di pakarangan rumah, lantaran warnanya nang unik wan tamasuk tanaman langka.

Di dalam Sirih Habang naya ada sanyawa fito kimia yaitu alkaloid, saponin, tanindan flavonoid (ngalih bangat manyambatnya nah, bahasa duktur barataan). Sirih habang naya tumatan bahari dipakai bubuhan padatuan kita hagan tatamba macam-macam panyakit, lantaran Sirih Habang diparcaya kawa manambayi panyakit nang kaya diabitis militus, hepatitis, batu ginjal, manurunakan kulesterol, mancagah stroke, asamurat, hipertensi, radang liver, radang prostat, radang mata, kaputihan, maag, kauyuhan, tulang pina ngilu, wan hagan kulit mulus mancoronong.

Cara manggunakan Sirih Habang naya nyaman haja, ambil talu atawa ampat lambar Sirih Habang nintu lalu dijarang wan sagalas banyu sampai manggurak. Imbah manggurak, banyunya nintu disaring wan didinginakan. Amalakan maminum banyu sirih nintu 2-3x sahari. Salain dijarang wan banyu, Sirih Habang kawa jua diunakan nang kaya teh. Caranya, sirih habang dijamur dahulu sampai karing bangat, imbah nintu hanyar dibuat ka bilinder supaya labih halus racikannya. Imbah sudah halus, kawa diulah hagan teh atawa dibuat ka dalam kapsul supaya tanyaman managuknya.

…Samuga Bamanfaat….

Iklan

2 thoughts on “SIRIH HABANG

  1. Parmisi lah dangsanak..umpat batakun nah,amun ubat tradisional gasan ambeian apa yu kira2..?saurang ni baisi panyakit ambeian nah,lawas pang sdh..inya amun BAB kaluar tu ambeianx,tp kaina di bw duduk satumat masuk pulang inya..asa padih-padih jua rasax..sdh jua maminum ubat toko,tp kd kawa manuntasakan jua..tolongai nah dangsanak mun ada sulusix..mail hj k akhmad_amin@yahoo.co.id tarimakasih hai dahulu nah..

    • ulun kada suah mancubai pang, tapi kawan ulun suah. Mudah2an mau wigas. Caranya, pian rancaki mamakan tapai gumbili/lakatan krn tapai tu banyak mangandung ragi nang baik hagan pencernaan.

      Bila dalam waktu 3 hari kaluar pulang ambiennya, maka parlahan2 inya akan tasumbat saurang, ujar kawan lun, imbah tu saminggu langsung ampih.

      Rancaki jua minum banyu putih.

      Pantangannya :
      es, timun, asam, pedas, manis

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s