BATATANGGUHAN


BATATANGGUHAN
Oleh: Xara Rangga, Banjarbaru

Bubuhannya di warung Angah Ibat tumbar, imbah malihat Busu Adum datang. “Ha ha, ka mana haja wayahne busu, maka kada suah talihat lagi?” Jar Badrun. “Aku madam dangsanak ae, 4 tahun, hanyar ini bulik pulang” jar Busu Adum manjalasakan. “Ka mana madamnya ti busu?” jar Fauzi manakuni. “Ka Tambilahan, Riau” jar Busu Adum. “Mudai kada suah talihat lagi, kayapa buhannya di sana, kaya kita juwakah rami basurung kisah mun takumpulan di warung?” Jar Toni maanyaki. “Kukurang tambah haja lawan di sia” jar Busu Adum pulang. “Mana ulih-ulih kisah di sana sagan stok Bubuhan Jingah Rabit ne?” Jar Hambali pulang. “Hadangi tuh lah, aku handak minum dahulu” jar Busu Adum pina banahap duduk.

Sunyi warung kaya malaikat lalu, mahadangi Busu Adum handak bakisah. Busu Adum ne urangnya katuju bakisah mangaradaw, mahalabio, wan katuju maulah urang takurihing sampai baliuran bila bakisah. Makanya bubuhannya pasti tumbur bila takumpul wan nang sekong ne.

“Kaeni buhannya ae, aku kada handak bakisah kada, aku handak mahungkar tatangguhan haja” jar busu mamulaikan karadawan.
“Hungkar ha busu ae! Kami siap haja mandangari” jar Ipul sambil baparak.

“Ban mutur pacul, kapal pandit, kayapa kaduanya sama sama bajalan? Satu kata ja jawabanya” jar Busu Adum.

Beh naning jua ai buhannya mamikirakan, napa kikira jawabnya leh? Macam-macam ai buhannya ti manjawab, kadada nang kawanya manangguh. Tapaksa ai buhannya ni, gong barataan.

“Pukuknya jawabannya rebes banar, kada ngalih, sutil kah jar urang tu” jar busu pulang. “Pacah kapala kami busu ae, gong barataan” jar bubuhannya pulang.

“Beh iya pang, handak tahulah jawabnya? PASANG! Selesai am sudah. Jadi bila ban mutur pacul, “pasang”, bila kapal pandit, “pasang”, maka kaduanya kawa pulang dijalanakan.

“Ada lagi nang sabutingnya, jawabannya gin satu kata jua. Kakanakan ni batakun lawan umanya nang batatapas, pas di batang banyu:
“ Ma! Ulun handak bahira!”
“ Ma! Itu burung nangapa?”

Cinik wan naning-naningnya pulang buhannya mamikirakan jawabnya. Asal jua buhannya manjawab, kadada jua am nang pas. Sampai sampai buhannya ni, gong pulang.

“Dasar jua buhanmu, masih haja kada tahu jawabannya lah! Maka sutil banar pulang jawabannya: KALUANG!” Jadi sakali haja umanya ni ba ucap! Dua tatakunan tajawab! Hehehe…”

“Nah ne nang tarahir, imbah ne aku handak bulik dahulu malihati tanah warisan mintuha, kalo ae dialih buhannya ugar (watas) salawas kutinggalakan.” “Ayu ha busu ae, esuk pulang kita, hungkar ha tatakunannya” jar Imis nang mulai tadi badiam haja.

“Biasanya buhan ikam ni suah kalo mandangar atawa mambaca ngaran-ngaran kampung nang mambacanya diasai atawa di ulang, cuntunya Aluh-Aluh, Asam-Asam, Bati-Bati. Nah! Mun kaya itu cariakan lagi ngaran-ngaran nang mirip kaya itu, saratus buting!”

“ Umaa! Kada kasandangan kaya ini, saratus buting! Paling dua tiga buting lagi ada?” Jar Badrun.
“ Hayu! Napa lagi, sambat!” Jar Busu Adum pulang.
“ Mali-Mali” jar Idup.
“Bujur, napa lagi, aku tadi minta saratus buting kalo” jar Busu Adum.
“Bah! Jangan saratus naya? Nang sabuting haja mancarii ngalih, banar! Apalagi mun sampai bararatus!” Ujar Fauzi pina kalihatan urat di dahi sibuk mamikirakan.

“Gong! Haja gin!” Jar Aau mawakili bubuhannya.

“Mun gong barataan, handak tahulah jawabannya. Kada ngalih kada mancari nang kaya itu. Gampang banar. Ne pangalamanku surang. Cuba ikam dangarakan di taksian Pal anam tu, dangarakan bujur-bujur, ‘Banjar-Banjar, Trisakti-Trisakti, Basirih-Basirih, Martapura-Martapura, Banjar Raya-Banjar Raya, Barabai-Barabai, Kandangan-Kandangan, Amuntai-Amuntai, Alabio-Alabio, Kalua-Kalua, Birayang-Birayang, Binuang-Binuang, Rantau-Rantau, Pleihari-Pleihari, Palangkaraya-Palangkaraya, Kapuas-Kapuas, Marabahan-Marabahan’. Mun masih kada cukup jua saratus, datangi ka taksian kapal wan kalotok, ‘Palingkau-Palingkau, Bahaur-Bahaur, sambung saurang sisanya” jar busu Adum.

Lalu badarau ai buhannya tatawa an, imbah dipadahakan jawabannya, wkakakakakakkkkk…aahgk…gak!

(n/b Salam gasan Ipul, Fauzi, Imis, Badrun, Aau, Idup, Mat Angin: mana nie pina hinipan, kadada beisi kisahkah)

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s