RAKAI TANDOK, KARING LINTUHUT


RAKAI TANDOK, KARING LINTUHUT
Oleh: Adum M. Sahriadi, Kelua

Angah Imran tahuk sudah sakit panghidupan. Napakah pina hari itu nasib Angah ne mujur banar. Batiga bos batu bara datang ka rumah handak manukari tanah Angah. Tanah di balakang rumah Angah ditukari bubuhan batu bara 500 juta, jar bubuhannya tanah Angah ne saluasan batu bara haja isinya.

Untung nang kadua, Angah ne beisian 3 ekong anak bibinian nang kambar, bujang wan bubungasnya. Salajur manyalajur bos-bos batu bara tadi mandatangakan anak sidin lawan anak Angah. Bangaran batiga bos batu bara ne, pada padanya manyurungi anak saikung saurang. Balalu Angah ne kaguguran bulan dipangkuan jar urang toe. Kada banyak pander, langsung tarima Angah nang badatang ne. Singkat kesah, Angah ne mangawinakan batitiga langsung anak sidin naik ka palaminan. Anak Angah ne ngarannya Irah, Sidah, wan Jahrah.

Imbah bakawinan, bangaran sugih dah Angah ne wan juwa minantu sugih barataan, jadi disuruh ae nang batitiga ne babulan madu. Irah tulakan ka Pulau Batam, Sidah tulakan ka Kepulauan Seribu, nang pambungsunya manurut kaluarnya waktu lahir si Jahrah, tulakan ka Bali.

Bangaran Angah ne sayang bangat wan anaknya wan kada suah tapisah, bapasan ae sidin supaya dikirimi habar nang digawe rahatan babulan madu te. Buhannya balima baranak ne, Angah, Bininya, Irah, Sidah, wan Jahrah, bapakat supaya jangan carubu lawan singkat haja pasannya, maambil habar sasuai iklan haja. Artinya bila ada habar, langsung malihati ka surat kabar atawa TV haja.

Tiga hari imbah tulakan buhannya ne babulan madu, datang ae SMS mulai anak nang panambayan, Si Irah nang babulan madu di Pulau Batam. Isi SMS-nya handap haja, “STANDARD CHARTERED”. Imbah toe langsung ae Angah wan bininya mancarii kuran Banjarmasin Post, kadada tatamu iklannya. Nukar pulang Radar Banjarmasin wan Kalimantan Post, kadada tatamu jua iklannya. “Cuba pang abahmu nukar kuran KOMPAS atawa Republika kalo ada di situ!” Langsungai Angah ne tulak ka pasar, sakalinya dasar bujur juwa, ada tulisannya di KOMPAS. Sakali dibaca, lihum-lihum nang badua ne kikik kikik tatawa, napang sakalinya bacaannya, “BESAR, KUAT dan BERSAHABAT!”.

Hari nang ka-4 datang pulang SMS nang kadua. SMS ngini datang mulai nang panangah, si Sidah. Isi SMS-nya gin handap, “NESCAFE di TV”. Mulai baisukan Angah badua nang bini mahadangi iklannya di tipi, ahirnya jam 10 ada jua ae iklannya. Bunyinya, “NIKMATNYA SAMPAI TETES TERAKHIR”. Kikik kikik an pulang buhannya tatawaan. “Liwar jua anakku nang saikung ngini” jar Angah sambil manyapui liur.

Hari nang ka-5 ditunggui kadada habar, hari ka-6 kadada juwa habar mulai nang pambungsunya, Si Jahrah. Bingung ae nang kuitan ne. Hari nang ka-7, kamarian ha pulang harinya masuk ae SMS mulai Jahrah. Isinya, “Bah, lihati di kuran Republika, iklan “CATHAY PASIFIC”. Balalu ae nang badua ne meambil kuran Republika nang ditukar panambayan. Ahirnya tatamu ae iklannya nang batulis, “7 KALI SEMINGGU, 3 KALI SEHARI, 5 JAM NON-STOP”. Sunyi badudua, kada sing suaraan.

“Nah am paling gawat ne nang pambungsunya sakalinya, rakai tandok, karing lintuhut” jar Angah tauling-uling kapala.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s