SALISMIN HANYAR


SALISMIN HANYAR
Oleh: El-Faroqy Noranie

Amang Kumba ni handak juwa baisin gawian kaya urang, imbah itu inya ni mamasukakan lamaran bagawi sebagai salis min. Singkat kisat singkat tali ruk, akhirnya ditarima juwa Amang Kumba ni bagawi salismin. Hari partama Amang Kumba bagawi mambawa barang jualannya yaitu masin panyadut dabu atawa pakum klinir (ujar urang kuta). Tuhuk banar dah Amang Kumba ni ka hulu ka hilir manjaja barang tu tadi kadada payu juwa lagi. Marasa banar dah uyuhnya jar Amang Kumba. Pukuknya harus payu tu pang jualanku ni ujar Amang Kumba, balalu ai masuk ka rumah urang.

“Assalamu’alaikum” jar Amang Kumba. “Waalikum salam…lalui ja…..!!!” Jar tuan rumah. “Nah dikira minta sumbangan saku ai aku ni” ujar Amang Kumba dalam hati, “Ulun ni bu ai, handak manawarakan barang iliktrunik, kadanya minta sumbangan pang” (Tatawaan nang ada di rumah tu barataan). “Nangapa tadi barangnya?” Jar ampun rumah. “Ini barang mutakhir jaman ini bu ai, ini masin panyadut atawa pangisap dabu, jadi kada lapah lagi pian basasapu, tinggal hidupi ja lagi, jadi santai bagawian” jar Amang Kumba manjalasakan. “Uhhhhhhhhhhh! Damintu ah, barapa haraganya ni nang?” jar ampun rumah batakun. “Murahhhh, parusuhaan ulun lagi parumusi, jadi maadakan diskun ganal-ganalan, ni harga asalnya 1.250.000,- rupiah” jar Amang Kumba. Tanganga ampun rumah. “Hadang hulu balum tuntung bapandir nah, ni kan parusaahaan ulun parumusi jadi harganya kada sampai saitu lagi cuma 799.999,- rupiah” jar Amang Kumba pulang. “Tatap ae larang” jar ampun rumah.

“Sa apa ada itu mun pandapatan pian sajuta sahari” jar Amang Kumba. “Hi ih amun pandapatan sajuta sahari, ni kada pang…” jar ampun rumah. “Ayuha kita tis dulu alatnya, luku pian handak nukari mun sudah malihat buktinya” jar Amang Kumba pina basumangat. “Kada usah gin, malapahi ikam ja nang ai, amun juwa kami manukari, larang banar pang!” Jar ampun rumah. “Ayuja bu ai, kada lapah juwa, pukuknya kita cubai hulu, hadangi… (sambil bajalan ka kartak maambil dabu banyak banar), nah…ni ulun hambur di rumah pian kaina ulun sadut lawan pakum klinir ni, bila kada barasih atawa banyak nang tatinggal ulun nang manyadutnya paki muntung ulun” jar Amang Kumba pina musni sambil mahambur dabu di rumah.

“Kada usaaaaaaaah!!! Nah am mun ikam hamburi tu sudah ayu ai di cuba (sambil takurihing). “Siiiip…laksanakan!!! (sambil mambungkar pakum klinir nang masih dalam kutaknya langsung mambawa masuk ka dalam rumah). “Buuu! Mana cucukan listriknya neh? (tuhuk banar mancari kada dapat). “Naaaaah…itu am masalahnya, rumah kami ni balum bapasang listrik atawa PLN.” “Baaaahh, iya am….kaya apa ni buuu?” “Jar kam tadi mun kada mau barasih ikam isap surangan luku, tapi tasarah ikam pang nang ae, pukuknya asal barasih ha rumah ku (sambil tatawaan nang ada di rumah neh). “Cilaka tiga balas mun kaya ini, isuk aku ampih bagawi kaya ini, lapaaaaaaaaaaaaaaaaaah….. !!!”

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s