UTUH PALILAK TATAMU HANTU


UTUH PALILAK TATAMU HANTU
Diambil dari Grup FB: BUBUHAN KULAAN URANG ALAI BORNEO yang dibuat oleh adminnya: Datu Panglima Alai

Di kampung Utuh Palilak ada kabiasaan bila ada bubuhan warga maninggal maka kuburannya dijaga akan wan dibaca akan Qur’an sampai qatam. Kabulujuran si Utuh Palilak naya tamasuk nang pasih bacaan Qur’annya, wayah dahulu Utuh Palilak sawat masuk Pasantrin tapi gara-gara macal di kaluarakan urang.

Alkisah al carita di kampung Utuh Palilak ada urang maninggal, ulih kulaan nang maninggal maka diupahakan urang gasan manjaga kubur, salajur mangatamakan bacaan qur’an. Ada batiga nang diamanahi, kapala ahuinya Kaum Masigit Julak Japar, saikungnya Kai Imat nang tarahir Utuh Palilak.

Kisahnya kanapa malam tarahir tu pas tatinggal juz amma haja lagi, bubuhannya nang jaga ni pina galisah bangat, banyak pang sababnya, partama pupuluran balum diatarakan kulaan nang maninggal maka malam nintu dingin bangat harinya, Utuh Palilak haja mambaca bilang tabayang guguduh panas tarus. Nang kadua, nyamuk banyak banar kabulujuran ubat nyamuk habis jua tapaksa buhannya mambanam sabut wara. Nang katiga, Utuh Palilak rarawayan maliat matan jauh di padang kadap ada bayangan putih mahanu timbul mahanu hilang tapi kada wani bapadah wan Julak Japar atau wan kai Imat.

Dalam hati Utuh Palilak tapikir, “Saku nintu nang ngarannya hantu takau nang bisa baubah baganal wan managuk ka manusia, tapi tanang haja ada Julak Japar wan kai Imat nang bisa manangkap hantu.” Kada tahan ahirnya Utuh Palilak babisik ka wadah kai Imat mamadahakan pada ada takau. Takajut kai Imat mandangar malapas ka tasmak lalu maitihi ka arah nang ditunjuk Utuh Palilak, sakalinya dasar babanaran ada banda pina putih sing ganalan, bagimit sidin manggawil ka Julak Japar sambil baucap, “Ui julak, kita kadatangan mahluk alam subalah nah, basiap-siap ha!”

Mandisap Julak Japar mandangar lalu kada lawas tadangar dua ikung tukuh tuha ni pina banyaring bacaan pamulaan ayat 4, imbah tu ayat Kursyi tatap kada hilang banda putih ti maka pina bagarak garak mahanu kaliatan mahanu hilang, imbah tu batambah pulang mambaca yasiin masih kada hilang jua. Utuh Palilak kada umpat babacaan lagi katatakutanan sampai al fatihah haja gin kada hapal lagi, pucat tapaluh dingin Utuh Palilak. Imbah Yasiin kada mampan jua lalu Al Baqarah sasurahan dibaca akan Julak Japar wan Kai Imat parak habis al baqarah kada hilang jua banda putih ti. Julak Japar sudah mamuntal ka tapih, kai imat malapas ka capal, kada sawat lawas bukahan nang tuha badua ti tatinggal Utuh Palilak saurangan kada kawa bagarak katatakutanan. Imbah nintu timbul kawanian si Utuh Palilak. “Mun dasar takdirku pacang ditaguk hantu takau, itu sudah katantuan Allah ta ala, tapi takaunya kubawai bakuntau hulu sampai mati ” ujar Utuh Palilak dalam hati.

Imbah tu tang kawa ha badiri Utuh Palilak, lalu maambil batang kayu manyasah ka arah hantu takau, sakali parak, bailai sudah tangan Utuh Palilak handak mamupuh takau, timbul ada bunyi, “…MMMMAAAAA…”, sakalinya nang disangka hantu takau ti anak sapi Susagap nang badiam di higa kuburan tu, lapas matan kurungan. “Bah cucuk ai kada tadas babacaan wan titiupan mun anak sapi pang sakalinya” jar Utuh Palilak.

Iklan

One thought on “UTUH PALILAK TATAMU HANTU

  1. umaaa.. dangsanak, asa hara hati mambaca mulai pamulaan ti, kalutupan hati.. sakan ti takau banaran.. ihh saklinya anak sapi.. ha ha

    mantap dangsanakai..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s