RAHASIA UTUH PALILAK


RAHASIA UTUH PALILAK
Oleh: Datu Panglima Alai

Serial Utuh Palilak

Wayahnintu di kampung Alai, ada bibinian baranak. “Bisalah aku maliat bayinya?” Ujar bibinian nang hanyar baranak nintu kasukaan. Tapi pas mangilik anaknya wan mambuka salimput anaknya, si bibinian tadi taliat manahan hinak. Bidan nang manungguinya bapaling muha ka luar jandila kada purun malihat muha si bibinian. Bayi nang dikiliknya sakalinya dilahirakan kada batalinga! Bujur pina takajut, si bibinian tatap manimang bayinya panuh kasih sayang.

Waktu mambuktiakan, bahwa pandangaran bayi nang wayahini sudah ganal wan di ngarani Utuh Palilak tumbuh jadi kakanakan nang rajinan wan sihat. Hanya panampilannya haja nang pina anih. Pas wayahnintu, si Utuh Palilak bagagas bulik ka rumah wan balukup manangis wadah mamanya. Mamanya pun tatangis sadih. Sidin tahu banar kaya apa kahidupan anaknya ni. Sambil basisigan, Utuh Palilak bakisah, “Ada kakanakan ganal mahuhulut ulun ma ai. Jarnya, Ulun ni katurunan urang gaib.”

Kacamintu pang, bujur tumbuh wan kakurangan, Utuh Palilak nintu wayahni sudah ganal. Barakat kasih sayang wan samangat kuitannya, biar baisi kakurangan, Utuh Palilak tumbuh jadi pamuda nang gagah wan pintar sakalinya. Utuh Palilak bisa jua bakakawanan wan inya dikatujui kakawanannya banar. Utuh Palilak ni harat bangat main kuntau wan harat mangaji. Inya jadi pamuda nang disagani wan dihurmati karana biar harat wan wani tapi inya hurmat bangat wan urang lain maginnya wan nang tuha apalagi.

Kada sapangatahuan Utuh Palilak, abahnya matan Utuh Palilak lagi halus manabung duit hasil manurih wan bahuma sagan mancari dukter di Banjar nang harat manyambungakan talinga. “Saya percaya saya bisa memindahkan sepasang telinga untuk putra Bapak. Tetapi harus ada seseorang yang bersedia mendonorkan telinganya” ujar dukter. Imbahtu abahnya Utuh Palilak lalu bacarian ai wan urang nang hakun mandunurakan talinga.

Babarapa bulan imbah nintu sampailah wayahnya Abah Utuh Palilak mangiyau anaknya, “Ui Nak, ada urang nang kada hakun disambat ngarannya hakun manyumbangakan talinganya. Abah harus sacapatnya mangirim ikam ka rumah sakit di Banjar bauperasi. Tapi, bararanaian hajalah!” Ujar abahnya Utuh Palilak.

Uperasi bajalan sukses. Utuh Palilak marasa tarlahir kambali. Muhanya nang gagah, jadi samakin gagah. Inya pun wayah ini sudah kuliah di kadukturan dapat biasiswa, satumat lagi jadi dukter jua.

Kada lawas imbahtu inya manikah, wan bagawi jadi dukter, bininya dukter jua urang Tambilahan di Riau sana jar, wan masih katurunan alai jua padatuannya. Pas wayah hari raya inya bulik ka kampung salajur mambawa bininya. Kuitannya ampih sudah bahuma wan manurih, kada dibariakan Utuh Palilak lagi sudah tuha pang wan banyak tajual gasan uperasi dahulu. Barataan biaya hidup kuitannya ditanggung Utuh Palilak. Pas di rumah baduaan wan abahnya inya batakun, “Bah, ulun handak banar tahu siapa nang sudah hakun mambari talinganya gasan ulun. Ulun handak banar batarima kasih wan urangnya.”

Abahnya manjawab, “Abah yakin ikam kada pacangan bisa mambalas kabaikan hati urang nang sudah mambariakan talinganya nintu.” Imbah badiam satumat abahnya baucap pulang, “Sasuai wan parjanjian, balum saatnya ikam tahu rahasia nangini.”

Tahun baganti tahun. Kadua kuitan Utuh Palilak tu tatap manyimpan rahasia. Utuh Palilak pun sudah ampat ikung baisi anak. Sampai wayahnya datang saat nang manyadihakan bagi kaluarga Utuh Palilak. Hari itu, Abahnya wan Utuh Palilak duduk basimpuh di hadapan janazah mamanya Utuh Palilak nang hanyar haja maninggal. Bagimit abahnya Utuh Palilak mambalai rambut jenazah mamanya Utuh Palilak nang tabujur kaku. Imbahtu abahnya manyingkap rambutnya, nang maulah Utuh Palilak takajut banar. Sakalinya mamanya kada batalinga lagi

“Mama ikam suah baucap sidin sanang banar bisa mamasang jilbab sasuai syariat agama” ujar abahnya Utuh Palilak babisik. “Wan kada saikung urang pun nang tahu bahwa sidin sabujurnya manyambunyiakan rahasia sidin gasan ikam?”

Imbah nintu tatangis Utuh Palilak. Inya marasakan bahwa cinta sajati mamanya nang maulah inya bisa jadi kaya wayahini.

7 thoughts on “RAHASIA UTUH PALILAK

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s