MALING BUNGUL


MALING BUNGUL
oleh: Datu Panglima Alai

Wayah nintu di kampung Utuh Palilak lagi musim sakit banar pancarian, ujar istilah bubuhan Jakarta “krisis munitir”, haraga barang saraba larang, maka musim kamarau ha pulang. Gara-gara kahidupan sakit bangat nintu lalu kaadaan kampung kada aman lagi, bamaling banar maka saraba dipalarnya haja di maling sampai “capal buruk” gin hilang bila kada ingat manaikakan ka rumah.

Karana kaadaan sudah kada aman lagi lalu ulih “Pambakal” diada akan runda malam bagantian. Saban malam balima sakali jaga, malam nintu nang takana jaga adalah Utuh Palilak, Haji Udin, Amat Buntal, Julak Umbai wan Guru Duan. Rami buhannya takumpulan di gardu sambil mambanam gumbili, karana nyamuk sing banyakan wan ubat nyamuk kada mampan lalu bubuhannya mambanam karatas wadah hintalu pangganti ubat nyamuk. Sambil asik mangipung gumbili bubuhannya batanding sanjata pusaka ganggaman masing-masing. Haji Udin maungkai “Naga Runting luk tigablas”, Julak Umbai maungkai “Sampana Carita”, Guru Duan maungkai “Mandau batindik”, Amat Buntal maungkai “Raja Tumpang” sadangkan Utuh Palilak Maungkai “Pacat Gantung”.
Lagi a’asikannya batanding ganggaman, rarawaian Utuh Palilak maliat humbaya malibas wan nyala lampu sintar di balakang Rumah Kai Ingut nang bahadapan wan gardu wadah bubuhannya bajaga. “Ui tuha’annya, ada humbaya urang di balakang rumah Kai Ingut, lakasi kita kapung!” Ujar Utuh Palilak.

Lalu badadas buhannya mamuntal tapih, Utuh Palilak wan Julak Umbai bukah tuju ka hilir mahadang parak padang gatah. Amat Buntal wan Guru Duan manyaluk jalan pinggir sungai. Haji Udin tatap di Gardu sambil mancatuk kakantungan, lalu tumbar urang sakampungan kaluaran, a’asingnya mambawa sanjata, ada nang mambawa Parang Bungkul, Parak Rawis, Tumbak Barumbai, Sinapang Angin ada jua nang mambawa sasunduk lawang wan halu.

Maling nang sadar katahuan urang kampung lalu bukah ka-“hahantuan”. Pamulaan, bukah basungkup di padang puhun “hanau” tapi kada lawas kuriakan urang kampung mamadahakan inya di balakang puhun hanau, lalu bukah ai pulang maling ti basungkup di higa pupundukan, sakalinya katahuan urang kampung pulang, imbah tu bukah pulang inya sasarusup di padang gatah. Sadang haja ah bukah ka tampat nang singkadapan malining tatap katahuan urang kampung.

“Iya am nah, tamasuki kampung urang sakti aku, kamana haja basungkup katahuan urang” ujar maling dalam hati.

Kada lawas karana kauyuhan bukah wan kahabisan akal handak mancari wadah basungkup, maling ti lalu bakuriak minta ampun manyarah. Imbah ditangkap urang kampung wan “dibalik halar” kada kawa bagarak lagi am maling ti lalu kalapauan ai sangkut, mulai “katupat kandangan” sampai “untuk karas” ka muha maling ti untung lakas Pambakal Hadran manyabar.

“Ui dangsanak kanapa ikam maka handak mancuntan di kampung kami, sama haja barataan pada sakit kita ni” ujar Pambakal Hadran.

“Ulun minta ampun, ulun hilap, ulun tubat kada pacang jadi maling lagi, jangan dijulung ka wadah Pulisi Pambakal lah, anak ulun halus-halus lagi kalaparan di rumah” manyahut maling ti.

“Sakali ni kami ampuni ikam, kami maklum haja kanapa ikam maka hilap, tapi awas jangan sampai tadua kali ikam kami tangkap, sabab nang kadua ikam pacang kami “garih” hidup-hidup” garatak Pambakal Hadran.

“Ulun bajanji “dami Allah ta ala” kada pacang maulangi lagi, tapi sabalumnya ulun handak batakun napa ilmu wan kajian hampian sabarataan di kampung ni maka tahu tarus wadah ulun basungkup, maka sadang haja ulun sudah basungkup di padang kadap” ujar maling ti sambil basujud di tanah.

Mandarau urang kampung tatawaan

“Ha..ha..ha.. nyata ai ikam katahuan kami tarus basungkup mun sintar ikam banyalaan pang” Ujar Pambakal Hadran.

Sakalinya maling ti sambil bukah mangasak sintar di balakang pinggang tapi lampunya kada ingat mamatii, nyata ai tarang lampu kikilalap di balakang, jadi katahuan urang tarus wadah inya basungkup.

Iklan

8 thoughts on “MALING BUNGUL

  1. kisah cukup menghibur dan menarik nampak suasana kampung bisa direkam disini, klo urang daerah kota agak sulit mendalami ceritanya maklum haja kadada padang hanau atawa rumbia,kadada jua padang gatah apalagi pupundukan,
    suasana jaga malam pass banar waktu kita masih tinggal di kampung karangan kecamatan landasan ulin

    • Memang setting tukang kisah ne di daerah pedalaman hulu sungai. bahasa nang digunakan gin masih bahasa hulu, hingga banyak kakawanan di kuala nang kada kenal bahasanya.

      Salam badingsanakan matan kami di Hulu Sungai

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s