UTUH PALILAK WAN URANG JAGAU


UTUH PALILAK WAN URANG JAGAU
Oleh: Datu Panglima Alai

Di kampung Utuh Palilak ada Urang nang paling ditakutani, ngaran sidin Pambakal Hadran. Bujur pang kada jadi pambakal lagi tapi tatap digalari pambakal, sabujurnya sidin handak ai pulang bacalun tapi oleh pamarintah diulahakan paraturan hanyar, nang jadi pambakal harus urang nang tuntung sakulah SMA atau Aliyah. Pambakal Hadran ni SD gin kada tamat nang tamat sakulah Tanam Biji haja. Pambakal Hadran ni dahulu dipilih jadi Pambakal karana sidin wani banar urangnya, amun di dunia parsilatan sidin ni suah manguasai 7 galanggang. Ujar habar sidin ni tahu di ngaran wasi, ngaran darah, ngaran tulang wan ngaran kulit makanya dinapai haja sidin kada tadas, lagi macal. Dahulu sidin ne suah jadi rampuk, di timbak pulisi kada papa, di Jawa jadi karnit diranjah mutur bis kada papa, tarahir sidin suah tulak ka Hungkung di karuyuk 40 ikung mafia Cina tatap kada papa, maka di sana urang mangaruyuk kada bakuntau pang tapi ditimbaki urang. Imbah nintu sidin bulik ka banua handak ba-insaf jar, tapi nang ngaran bakas jagau tatap dihurmati urang lalu dijadiakan urang pambakal.

Wayahnintu Pambakal Hadran duduk di palatar bapuntalan tapih kada sing bajuan, cipus-cipus ha baruku, kada lawas datang Utuh Palilak baparak. “Uii pambakal, narankah hampian tahu di ngaran kulit wan tulang jadi kada sakit mun dipupuhi?” Ujar Utuh Palilak. Tatawa Pambakal Hadran mandangar tatakunan Utuh Palilak, “ Ha ha ha, tu kajian urang bahari tuh ai” ujar sidin. “Amun bujuran, ulun handak maliat narai kaya apa buktinya, kaina ulun bari pian duit 20 ribu” ujar Utuh Palilak.

Mandangar handak dibarii duit 20 ribu lalu ranai ai Pambakal Hadran maka pas nintu sidin kada sing duitan jar sidin dalam hati, “Malaran banar 20 ribu kawa manukar ruku wan nginum ka warung.” Imbah nintu sidin baucap, “Ui tuh ambil kayu bapangkih di bawah rumahanku, imbah tu ikam hambatakan ha ka awakku tasarah haja handak di mana!”

Hancap Utuh Palilak maambil kayu bapangkih nang ganal kaya landau, imbah basanam satumat lalu mahantai ai ka awak si Pambakal Hadran, imbahtu gadagupan Utuh Palilak mahambatakan kayu bapangkih, ada pang 10 kali saku sampai patah kayunya, Pambakal Hadran tatawa haja. “Asa dikuyayapi samut awakku” jar sidin ba-agak.

“Ulun manyarah pambakal ai, hadang ulun maambil duitnya ka gardu di muka tu” jar Utuh Palilak manggalunyur tuju ka gardu. Sakalinya di gardu takumpulan, buhan kakawanan Utuh Palilak ada jua si Hindra anak haji Udin nang baduit banar urangnya.

“Bubuhan ikam mahitung saurang luku ada pang 10 kali aku mamukul Pambakal Hadran kada alang-alang lagi pakai kayu bapangkih, sasuai parjanjian sakali mamukul 50rb kali akan 10 jadi 500 ribu” ujar Utuh Palilak mananai tangan ka wadah Hindra anak Haji Udin. Masam muha Hindra maunjuk 500 ribu ka Utuh Palilak. Pambakal Hadran nang tahu pada dibunguli si Utuh Palilak parak banar sudah sarik, untung lakas Utuh Palilak mangajal ratusan ribu nang hanyar ka tapih Pambakal Hadran, lalu hinip ai sidin dapat duit 100 ribu.

Imbah tu bukah ai lagi Utuh Palilak sambil kukurihing mangipas akan duit ratusan ribu 4 lambar.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s