SU IJAK KANA BUNTUT


SU IJAK KANA BUNTUT
Oleh: Datu Panglima Alai

Dahulu lagi zaman raramiannya SDSB (buntut) bubuhan kampung Utuh Palilak ta umpat jua kacanduan, matan kakanak sampai kayi-kayi manukar jua, pukuknya bila malam Kamis rami pada hari pasar tu pang takumpulan. Maka nang ngaran SDSB ni banyak bangat mudaratnya, kanapakah wayahnintu pamarintah maka sampai mambulihakan. Di sakulahan Utuh Palilak haja kadada lain nang dibahas pada batanding rumus, sampai guru Matimatika nang maulahakan rumus.

Wayah nintu tumbur di kampung Utuh Palilak mandangar Su Ijak kana buntut ampat angka. Maka zaman nintu kada sasadikit duit bila kana ampat angka. Su Ijak ni urangnya sakit banar, baisi rumah sing burukan. Saku mun digujai (ditinjak) sakali gin bisa runtuh rumahnya. Imbah kana buntut ti lalu balinggang ai bulik Su Ijak, takurihing tarus “marihiw tariw” di jalan bila batamuan urang. Sampai di muka rumah sidin batamuan wan Utuh Palilak.

“Banarankah hampian kana buntut Su?” Ujar Utuh Palilak. “Naran Tuh ai, kaina isuk ikam aku bayari makan wan nginum sapuasnya di waruk Acil Aluh” ujar Su Ijak. “Mun kaya itu dibanam ai lagi rumah hampian nang sing burukan naya, kaina pian baulah ba asa nang taharat” ujar Utuh Palilak. “Ayuha Tuh ai”, imbah baucap kaya itu Su Ijak mancacak mancis ditimbai sidin ka hatap rumah, napang ada barau api, tumbur urang sakampungan tapi imbah tahu kisahnya rami urang manuntunan. Kada lawas tadangar urang basuara.

“Timbai jua kupiah buruk hampian Su ai!” Jar suara tadi nang sakalinya Amat Buntal. Su Ijak ni rupanya ambungan urangnya lalu manimbai ai ka kupiah buruk nang sudah bakulat nintu ka api, imbah tu timbul taduduk sidin, pucat muha limbui paluh handak siup, abut urang kampung mangipasi.

“Kanapa hampian Su?” Ujar Utuh Palilak. “Aku kada ingat pada di sasala kupiah buruk tuti ma andak kupon SDSB nya” ujar Su Ijak salajur laip.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s