HAMBAL


HAMBAL

Malam senayan Julak Ijum basaruan di rumah sidin bahwa akan maadakan acara bahaul mintuha sidin. Jadi di rumah Julak Ijum urang sibuk, ada nang mangawah, bubuhan ibu- ibunya mamasaki sambal gasan sasurungan urang kaina pas imbah ampih babacaan, maklum sudah kaya itu adat nang bajalan. Mun imbah babacaan urang langsung bulikan asa kada tapi nyaman.

Pendek kesah Julak Ijum manyalangaraakan haulan mintuha sidin ini sadikit baganalan, pokonya bahabisan tu pang. Hambal hanyar nukar diampar langsung gasan urang dudukan, lampu malampu diganti supaya tarang, jadi tuan guru kada ngalih babacaan, kaina jar sidin kakurupan lampulah pulang.

Imbah Isya Julak Ijum langsung basaruan, nang paling pandahuluan disarui sidin adalah Pambakal Madian. Tuntung basaruan, bulik Julak Ijum ka rumah, urang nang taparak rumahnya lawan sidin sudah datangan, Pambakal Madian gin sudah datang jua sidin jua nang manyambuti tamu.

Tuan guru sudah datang urang mulai babacaan, Pambakal Madian lawan Julak Ijum duduk diparak tuan guru. Pas urang tuntung babacaan nang dihadangi para kakanakan akhirnya datang jua, yaitu makanan. Dilihat matan piringnya pina mahabang, bah masak habang ni jar bubuhan kakanakan.
Rami urang makanan, pas patangahan urang makanan Pambakal Madian pina masam muha, jadi ditakuni Julak Ijum ae, “Napa pambakal? Kurang sip kah masakan bubuhanya?” ujar Julak Ijum.
“Kada Jum ae” jar pambakal, “Asa kada tapi nyaman parut banarai” jar sidin.
“..Ooh!” jar Julak Ijum, “Kaitu kah pambakal ae” jar julak, “Bubuhannya asaku asa kapadasan jua pang maolah kuahnya.” “Iih” jar pambakal masih pina masam muha.

Tuntung urang makanan, sapalih ada sudah nang bulikan ada jua nang masih batinggal sambil bapanderan, tamasuk Pambakal Madian nang matan tadi kada sing garakan, pina hibak ha paluh. Habis sudah urang bulikan tatinggal pambakal lawan Julak Ijum dan para bubuhan ibu-ibu nang mamutiki piring haja lagi, jadi bapanderai pambakal, “Jum barapa jua ikam manukar hambal nang ini tadi, asa pina nyaman diduduki” jar pambakal.
“Oh anu pambakal ae di pasar siang tadi, umanya pang nang ampun pilihan” jar julak.
“Ooh” jar pambakal, pina masam pulang muha sidin, jadi kadapur ae Julak Ijum mambisiki lawan nang bini, “…Ding buatakan dalam plastik gasan pambakal kalo pina sidin mahadangi barakatnya” jar julak lawan bininya.
Dibungkusakan nang bini ae gasan pambakal, diandak di higa sidin, tapi sakalinya kada bulik jua sidin. Heran ae julak lawan nang bini. Jadi bapanderai pulang pambakal, “Jum barapa tadi haraga hambal nang ini jar pambakal aku haja nang manggantiinya” jar sidin. “Murah ja pang pambakalai, banyak haja pang urang bajual di pasar” jar julak. “Kada, kutukari balabih pada haraga pada ikam nukar” jar pambakal mamaksa. “Kada pambakal ae jar julak. “Rabit sadikit barang” jar pambakal. “Napa gerang pambakal jadi handak banar manukari hambal nang ini” jar julak heran. Pina supan ha pambakal manyambat “….Anu Jum ae tadi sambal masak habang ulahan bubuhannya tadi asa padas banar aku kada tapi tahan parut lalu pina maula ula haja jar sidin”.
“Imbah pang kanapa?” jar julak. “Anu Jum ae….” jar sidin, gamat ha bapandir, “Aku tapucirit di hambal ikam ini,jadi asa ngalih jua aku ikam hanyar nukar wan hambal…”jar sidin.
”Oooooh kaya itu pang” jar julak sambil tatawa ka dapur maambil ember…

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s